E cancion “Laga nan Yama bo Cayente” mesora lo conecta bo cu e cantante, Tommy-Lee Halman, cu a forma parti di e popular banda Buleria pa un tiki mas cu 3 aña. E tabata un integrante di e banda desde su inicio te 15 november 2017, y desde comienso di e aña aki Tommy-Lee ta trahando riba su propio produccionnan. El a comenta na FOCUS cu e no tin pura pa saca nada actualmente. Su focus prome ta regla su cosnan personal, pa e por tin e ‘tools’ cu e mester pa produci y sigui produci loke cu e kier. Kisas e lo tarda pero p’e, esey tur ta bale la pena.
Tommy-Lee Halman a sali di Buleria pasobra e ta kere cu den ‘long run’, tanto e como cantante como e banda tabatin diferente expectativa di loke ta e futuro di e banda. Esey tabata e motibo cu el a dicidi pa focus bek riba su bida personal y su otro proyectonan. Den un entrevista den revista FOCUS dos aña pasa por a lesa cu Tommy-Lee a cuminsa canta den misa y cu e ta un persona cu gusta hari y ta semper rustig.
Su experiencia como cantante ta un di e sintimentonan di mas dushi den bida, esta pa entretene hende. E ta algo cu bo no por echt splica, e ta algo cu bo ta sinti. E no ta kere cu e lo por stop pa semper ademas e sintimento ey ta haci hopi falta e dianan aki”.
Riba e pregunta si e ta haya falta di e spotlight, Tommy-Lee a contesta: “Pa ta honesto si! Mas fastioso ora facebook ta keda manda reminders di kico bo a haci aña pasa e dia aki, ect, etc… Cansa hende ☺
Actualmente Tommy-Lee Halman ta e Marketing Officer y PR na Kooyman Aruba unda e tin 1 aña y mey trahando. Su rutina diario riba un dia normal den siman ta cuminsa cu gym of preparacion pa e dia. Despues di gym ta trabou, despues di esey ta cualkier proyecto cu e ta bezig cu ne. E ta yega cas bek normalmente 11or y den weekend e ta prefera haci absolutamente nada of bay lama relax. Loke e ta gusta mas di su trabou ta cu for di momento cu el a cuminsa, su hefenan a mustre cu nan tin confiansa den dje. E trabou p’e ta hopi flexibel aunke e lo tin e cosnan menos leuk pa haci, pero esey ta nada compara cu e flexibilidad cu e tin pa cu su hobbynan y biahamento.
