Aunke durante hopi aña Claudine de Ponte a pinta pa su mes, amistad y famia, e tabata algo completamente nobo pa presenta su trabou na Aruba Art Fair dilanti di un publico grandi. Mirando con e hendenan tabata stop, para, mira, conecta y haci pregunta di su obranan tabata un sentimento masha bunita. Mas ainda como parti di ROOTED IN COLOR a ser bendi cu personanan cu di ambos banda no conoce otro, pero djis a conecta cu Claudine su pinturanan ta yen’e di inmenso satisfaccion. E debut aki ta un comienso publico, pero no e comienso como artista, paso el a pinta semper.
Locual ta nobo pa Claudine ta cu awor el a habri e porta pa un publico mas grandi y bisa: “Esaki ta mi trabou”. E ta sinti cu e experiencia a dun’e mas confiansa pa comparti loke e ta haci. Esaki p’e ta e prome paso di un caminda nobo. For di e mundo di beyesa pa e mundo di arte no tabata realmente un transicion, pasobra arte tabata semper parti di su bida. E reto tabata mas pa duna su arte e mesun espacio y atencion cu e tabata duna su carera profesional. Durante hopi aña e tabata enfoca riba su trabou y awor e tin mas libertad pa dedica tempo na su pintura y expone pa e publico.
E nomber di e coleccion ROOTED IN COLOR a nace for di loke Claudine gusta pinta. Cual ta e mata cu tin su raiz planta y ta forma e brug entre tera, aire y ser humano, cu ta refleha a traves di e colornan cu e ta traha cu ne, pero e tin tambe un significado mas personal. Durante su carera den e mundo di beyeza, e tabata traha cu color diariamente. E ta mira Aruba y color como sinonimo. E tera cora, kibrahacha geel, sombranan blauw di lama y bahada di solo ta un inspiracion. E coleccion aki ta combina su amor pa naturalesa, conexion cu Aruba, nos iconico Divi Divi, e diferente forma di palma, lama, cultura y su fascinacion cu color. E nomber “Rooted” ta representa e raiz, pero tambe fe di unda e ta bin.
Claudine ta describi su estilo como nature abstract cu structura y expresion di imaginacion, unda e ta explora e forma no representativo di naturalesa. E ta traduci paisahenan organico den colornan briyante, intenso, cu ta captura e energia, fluidez y movimento cambiante, en bes di duplica. Den Focus Digital Magazine di e luna aki, Claudine de Ponte ta conta con su carera anterior a influencia su wowo creativo y su conseho na esunnan cu kier sigui un pasion creativo despues den bida. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
