Edicion di FOCUS pa e luna di mei manera tur aña tin su highlight special dedica na nos Mamanan en conexion cu e celebracion di e “Dia di Mama”. Riba e bunita portada pa e luna aki tin Shandeeh Arends, cu esaki ta di 4 biaha cu e ta riba portada di FOCUS.
Pa Shandeeh e ta un sensacion great di por wak bek, pero tambe e ta haya esaki un bunita recuerdo cu e por comparti cu su yiunan despues. Na momento cu Shandeeh mester a haci e session di photo shooting e biaha aki, mas cu claro tabatin su retonan, compara cu 6 aña pasa. E experiencia e biaha aki tabata un poco mas pisa, mirando cu e baby tin apenas 3 siman. Sinembargo Shandeeh tabata ansioso y contento di tin e oportunidad aki di haci un session di photo shooting cu su 2 yiunan, Rocco Maximus Everon y Xiannah Love Everon.
Den FOCUS por lesa Shandeeh su experiencia di haya yiu cu 29 aña y awor cu 40 aña, cu sigur tabata un parto doloroso.
Den edicion di mei tin mas reportahe cu diferente Mama, cu cada un ta conta di nan experiencia, lucha y retonan. Tin e testimonio di Maureen Kelly y su lucha di un mama cu yiu autista, sin embargo tur e esfuersonan cu el a hinca den Jocelyn tabata bale la pena. Joase-Een van der Biest cu ta conta di e temporada mas duro di su bida, di ta un mama soltero di 3 yiu chikito y studia full time durante y despues di divorcio. Jolanda Salas su experiencia den e etapa nobo como un wela hoben y e lazo fuerte cu su yiu Shandeeh Geerman. E relacion excelente di mama y yiu, Ana Conliffe y Diana Mosher-Herrera, cu no semper ta facil pa separa e sentimentonan di negoshi pero nan a sa di surpasa varios obstaculo.
