E nomber di Levi Thodé ta laga nos pensamento bay riba baile, eleccion di reina y carnaval. Levi despues di 2011 cu e mester a entrega e corona di Reina di Carnaval di Aruba, no a participa den nada mas te aña 2016 cu el a join fakkel. E aña siguiente e tabata den tur e paradanan y awor caba e ta hopi emociona sperando Carnaval 65.
Riba e video nos por mira un toke di e presentacion di Levi cu e grupo di baile Cocorico Inmotion. Esaki ta parti di nan presentacion di Carnaval y baile cu costume na e hotelnan. Como integrante di e grupo di baile, ta su segundo trabou cu e ta considera mas como un hobby. E smile y ‘excitement’ di e turistanan ta su felicidad y e lo sigui promove nos dushi isla atrabes di baile demostrando nos cordialidad.
Levi ta felismente casa y hopi namora di Juancarlos Van Den Berg y nan ta bendiciona cu nos 2 yiu; Lacey Jane (6) y Lyon-Dre (3). E famia a caba di bolbe di Boneiro unda nan a disfruta di un dushi vakantie gozando entre otro Dia di Rincon. Levi su famianan ta tanto di Boneiro como di Corsou aunke mayoria famia part’i tata ta di Boneiro. Di chikito Levi a cera conoci cu su famianan na Boneiro unda frecuentemente nan tabata bay bishita nan aunke awor na grandi no mucho mas.
Levi a menciona na FOCUS cu e no ta wak su mes mas como Levi Thodé sino mas bien un Levi Van den Berg. Su bida casa a trece hopi bendicion den nan hogar y nan no ta imagina nan mes sin otro. Hunto Levi y Juancarlos a inicia e compania Luxaire Aruba cu ta un negoshi di airco, esaki durante e temporada cu Levi a stop di traha cu su tata debi na e salud critico di nan yiu homber. E lunanan dificil na aña 2016 ta tras di lomba y nan ta gradici Dios cu actualmente tur cos ta mihor cu Lyon-Dre.
E aña aki a habri bon y ta preparando pa celebra nan 5 aña casa na december cu Dios su poder huntu cu nan famia- y sernan keri. Levi a celebra su 25 aña dia 3 di mei y pa e fecha special aki, el a haci un photo shooting cu Jimenez Photography. Segun e palabranan di e encantadora ex-reina aki, cu loke mas nan gusta haci como pareha ta tuma tur diadomingo pa e muchanan. Apesar cu den siman tin un rutina di tur atardi prome nan bay drumi, nan ta percura pa sigur tur weekend ta for di nan rutina di custumber.
