E luna di december y specialmente e temporada di Pasco y Aña Nobo ta uno yena cu hopi emocion mixto di felicidad y nostalgia, pero mas cu tur expectativa. Expectativa di con e dia tin cu bay, con nos tin cu sinti, regalo cu nos mester duna of haya y expectativa pa cu otro hende. Algo cu nos no tin ningun control riba dje.
E expectativa cu mas ta resona ta esun di regalo. Cu e calidad y e prijs di e regalo nos ta midi con hopi nos pareha, nos mayornan, nos yiunan y coleganan ta stima nos. E expectativa cu riba e dia aki tur cos ta bay ta paz, tur hende ta comporta di manera perfecto; nos ta pone hopi presion innecesario riba nos mes y otro hende te cu nos ta yega na e sentimento di desapunto ora e fantasia no ta cuadra cu e realidad.
Awe, mi ta desea di curasha tur hende pa duna boso mes y otro un regalo di balor berdadero: e regalo di autoestima y amor propio.
– Sea OK cu imperfeccion
– Tene un combersacion real y honesto cu bo mes y bo famia tocante amor propio. Papia di e sentimento cu tur por ta sinti.
– Crea un zona sigur di autoestima
– En bes di cumpra regalo caro cu porta nan mes no kier: laga bo yiunan scoge algo cu nan ta desea, algo pa bisti of algo pa uza pa scol/hobby. Pone limite (un cutoff price) pa siña balor di finansa na cas.
– Descansa y disfruta na cas y no yena e schedule cu tanto bishita – tempo di calidad versus tempo di cantidad.
– Practica gratitud pa tur loke bo tin y loke bo ta aprecia di otro y di bo mes.
Pasco, un momento di felicidad y gratitud, ta presenta nos cu un profundo oportunidad pa refleha riba e miho regalo cu nos por duna nos mes – e regalo di amor propio y autenticidad. Celebra e ser unico cu bo ta, brasa bo biahe interno y corda semper cu bo ta un ser di luz.
Mindful Love Aruba ta desea un y tur un Bon Pasco y un Feliz Aña Nobo yena cu salud, paz, abundancia spiritual y un copi yen di amor propio.
