Aruba Bank a cuminsa su gran celebracion di 100 aña cu un fiesta di a Aña Nobo pa su empleadonan, marcando e inicio di un aña dedica na honra e herencia di banco y pone bista riba futuro. E anochi di alegria a tuma luga den un ambiente di celebracion y a inclui un discurso special di Sharon Fränkel-de Cuba, Managing Director di Aruba Bank. Sharon a expresa gratitud na su empleadonan, y a describi nan como e “motor di e banco.”
“Durante e 100 aña cu a pasa, Aruba Bank a sirbi como un pilar di nos comunidad, y e confiansa ta e fundeshi di nos exito. Mientras nos ta celebra e momento special aki, nos mester honra nos experiencia sin igual como pioneronan den e mundo bancario y continua innova pa sigui move pa dilanti,” el a expresa.
E empleadonan y invitadonan cu tabata presente a bisti na e color blauw, e “dresscode” pa e evento cu ta simbolisa nan marca. E anochi tabata yen di entretenimento, cu a inclui presentacion di Buleria y Skale, cu a crea un tremendo ambiente festivo. Mientras Aruba Bank ta celebra un siglo di excelencia, e banco ta spera un aña yen di evento di celebracion, reafirmando su compromiso pa sirbi comunidad Arubano cu profesionalismo, innovacion y enfoke riba construi un futuro mas briyante.
