Despues di 6 aña, Ika ta bolbe di bishita na su dushi isla Aruba. Desde aña 1999, e ta residencia na Hulanda y semper el a biba na Amersfoort. E ta gusta e luga door cu e ta central y e por move facilmente pa e otro stadnan. Aunke cu Ika ta bibando casi 21 aña leu di Aruba, e tin su isla completamente graba den su curason.
Ika ta stima su isla Aruba y loke e ta haya falta ta di nos frutanan di mondi, cuminda crioyo di su mama y e brisa di lama. E ta yegando dia 16 di juli y riba su lista e tin na prome luga, pa cana un poco cu su mama den mondi di Santa Cruz pa piki dader. E ta pura pa yega tambe, pa come tur e cosnan dushi cu su mama a vries p’e, manera pinda di cunucu. E lo bay encanta atrobe pa bay pisca na baranca, y sin duda pa topa cu tur su famia y amistadnan, cu e no a wak pa basta tempo. Loke e ta mas emociona ta pa mira con Aruba a progresa.
Como un hende muhe creativo, positivo y energetico, Ika ta bisa cu 2018 ta un aña bendiciona den tur sentido, tanto profesional como personal. Profesionalmente e ta ocupa ta focus pa su IK DESIGN shop por bay bek na e stad Almere, caminda varios di nan clientenan ta pidi pa nan habri e shop bek eynan. Aworaki hunto cu su yiu muhe, Migdalia, nan ta druk bezig pa diseña estilonan nobo y extravagante, manera; African, Indian y Egypt look. E nomber di nan compania lo cambia tambe den futuro, pero pa awor e ta keda un sorpresa! Apart di e compania di IK DESIGN, Ika ta trahando riba un buki cu ta titula: “Vloek, glamour en vrijheid”. “Locual cu mi por bisa tocante di e buki ta, cu e ta bay di mi mesun persona, un berdadero “true story”.
Ika ta dedica e buki aki na tur hende muhe cu a lucha y ‘never give up’ den bida. Y cu orguyo e por bisa cu e tambe a haya su “vrijheid”, e libertad cu a dura hopi aña y awor e ta wante duro.
E DOS YIU MUHERNAN DI IKA
Stefanie ta sperando un ‘baby girl’ mientras hunto cu Eldrich nan ta contruyendo nan hogar y nan mesun compania.
Migdala Werleman ta traha hunto cu su mama den IK DESIGN cual pronto lo cambia di nomber.
