Durante un pop-up event organisa pa Dushi Carnival Group, Ilaijah Croes, a ser corona como Youth Queen Dushi Carnival Group riba diasabra 7 di juli. Cu Ilaijah su participacion, e comunidad di hendenan special kier un bes mas mustra cu nan por, si nos como comunidad kere den nan, y duna nan e oportunidad.
Ilaijah ta sobrina di Irina Croes, cu ta un carnavalista desde di chikito y cu a habri parada di mucha como Reina Infantil 1987, y despues el a participa tambe na eleccion di Reina Hubenil. E representante di “Stichting Sea Bunita Sea bo Mes”, Marianela Geerman, a splica cu Ilaijah su participacion den eleccion di Reina Hubenil di Carnaval 65, tin como meta pa trece conscientisacion di inclusion di su mes, su amigonan y tur hende special den nos comunidad.
Ilaijah a celebra recien su 14 aña dia 8 di juli y e ta un hoben cu gusta modela, baila y sigur ta encanta carnaval. Ilaijah su mensahe ta “Sea Bunita Sea Bo Mes” y e ta spera cu e por conta cu e aceptacion y apoyo di Aruba completo, pa por haci su soño bira realidad. E anochi di su coronacion Ilaijah a baila y goza riba escenario y Chaz Models a presenta un baile pa e publico presente treciendo e mensahe di “Stima mi y Inclui mi”. Maria Victoria, Reina Hubenil di Dushi Carnival Group 2017, a baha corona y Sabina Rey, Reina Grandi Dushi Carnival Group 2017, a entrega e sjerp. Aldrick Croes cu ta e group leader a efectua e coronacion mientras cu Joally Croes a haci entrega di un regalo na Ilaijah.
