Den un ambiente ameno y tropical na Divi Links, GLW Foundation, organisador di Miss Teen Aruba International, ta efectua nan instalacion y presentacion oficial na prensa, pa loke ta e candidatanan pa aña 2018 di Miss Teen Aruba International. E aña aki e organisacion ta celebra nan di 2 lustro, unda tabatin hopi triunfo grandi na nivel internacional. Un gran cantidad di invitado, prensa y colaborador a presencia e momento cu 7 hoben a haci nan entrada riba red carpet, pa asina presenta oficialmente.
Debi cu ta celebrando 10 aña , a opta pa pone e numbernan den un piñata grandi, cual tabata algo masha unico y a duna un toke special na e anochi. Cada candidata mester a ranca un string, pa kibra e piñata y aki mesora wak ki number oficial nan lo competi cu ne durante e certamen di Miss Teen Aruba International.
E siguiente actividadnan ta; Miss Teen Folklore den Fort Zoutman dia 5 di mei, Miss Teen Speech dia 9 di juni, e Gala Dinner dia 7 di juli y e gran final ta diadomingo 15 di juli den Aruba Marriott. FOCUS ta desea tur e candidatanan hopi exito y na e comision di GLW Foundation, cu su presidente George Winterdaal, PABIEN cu e 10 aniversario!
