Tin un dicho na Hulandes hopi popular, cu ta bisa; “De appel valt niet ver van de boom” y nos ta referi aki na Karen-Ann Odor y Edwirah Brete.
E yiu muhe cu ta siguiendo e pasonan di su mama den mundo di modelahe y cu su look exotico ta capta tur mirada.
Edwirah a subi pasarela pa prome biaha na maart 1996 pa competi den “Youth Model Competion” den categoria di “Beginner”. El a gana e competencia y e aña siguiente el a competi den e categoria profesional, cual el a gana tambe. Edwirah a sigui competi y e siguiente titulo cu el a logra tabata “Best Female Model of the Year 96”. Na aña 1997 el a gana “Star Model di Aruba Moda” cu e tempo ey tabata un competencia di prestigio na Aruba.
Cu su logronan y popularidad, Edwirah tabata un di e modelonan cu semper tabata riba pasarela den e shownan di Ronzzio Couture Style, Deluxe Fashion Show di Aruba Moda como tambe den otro shownan mas y den comercialnan. Un recuerdo memorabel pa Edwirah ta momento el a pose pa e fotografo renombra, Sergio di Franchesco, pa e portada di FOCUS.
Awendia su yiu muhe, Karen-Ann Odor (17), ta demostrando cu el a hereda e talento di su mama. El a cuminsa manera hopi di nos modelonan local cu KOMA Models unda el a resalta dilanti lens di e fotografonan. Karen-Ann a modela riba e pasarela di Fashion Meets Art den Art Fair y despues hunto cu su mama y su ruman Kelly-Ann pa e diseñadora Gigliola Gomez. Nan a presenta hunto e diseñonan di Gigliola di su creacionnan di Breeze Collection y Sunset Cartagena.
Aworaki Karen-Ann ta enfoca riba su participacion den e certamen di Miss Teen Aruba International como representante di Mirrors. Riba e anochi final dia 15 di juli nos lo admira con e lo transforma su paserela di modelo pa cana como un berdadero miss bou guia di e guru di beyesa Edgar Kock. E conseho di Edwirah na su yiu muhe ta, pa disfruta di e temporada aki y keda semper e mesun bon hende. Nan tin un team dinamico su tras cu ta kere den su potencialnan. Éxito Karen-Ann!
