Cada un di nos ta eherce un profesion, cu ta exigi mas cu djis asumi responsabilidad y deber. E amor, dedicacion y pasion cu uno mester tin pa su profesion, ta e yabinan clave pa disfruta di bo trabou 8 ora riba un base diario pa hopi aña. E trabou laboral cu cada un di nos ta eherce diariamente ta di sumo importancia pa desaroyo profesional como tambe personal y semper bo trabou tin cierto impacto riba bo bida y formacion.
Den revista FOCUS di e luna aki a haci varios persona for di diferente sector e pregunta; “KI SATISFACCION NAN TRABOU TA DUNA NAN”.
Thanya Croes
Policy Advisor for Special Projects
Su trabou actual ta dune un satisfaccion grandi, pasobra e tin e oportunidad pa por yuda su pais y yuda su hendenan. Y tambe cu e mes tambe ta siña hopi.
Rodulfo Dirksz
Social Media Coordinator Renaissance Aruba Resort & Casino
Su satisfaccion di mas grandi ta pa wak e reaccion positivo di nan huespednan riba nan plataformanan di Social Media. E no ta facil pa crea un post cu ta atrae y crea trafico riba nan rednan Social.
Sharon Meijer
Policy Advisor na Departamento di Asuntonan Economico den e unidad di Foreign Economic Relations & Exprodesk
E satisfaccion mas grandi den su trabou, ta e oportunidad pa contribui na un desaroyo economico sostenibel y innovativo na Aruba. Ademas di esaki Exprodesk ta duna guia, tayer, presentacion y training pa yuda nan realisa nan metanan empresarial.
Rigo Croeze
Restaurant manager Urataka Center
Su trabou varios biaha por lag’e uza su creatividad, cu ta mas den e parti culinario. Tambe e gratitud cu e ta haya di nan clientenan, cu mas bien durante tur e añanan di existencia, a forma manera un culto, paso di berdad nan tin e clientenan mas fiel na Aruba.
Tarita Riley
Entrepreneur
E trabou di diseño interior y construccion ta uno hopi desafiante, pero e satisfaccion di e clientenan contento ta hopi grandi. No tin nada mas dushi, pa ta parti di algo, cu ta forma parti di bida diario di un hende.
Alan Howell
Parlamentario
E satisfaccion di mas grandi ta, pa haya e confiansa di pueblo pa por ta un Parlamentario y saliendo tur dia di Dios, na defensa di nos pueblo y nos dushi pais Aruba.
