E
Duke y Dukesa di Cambridge, a sali hunto for di e portanan di Lindo Wing di e Hospital St Mary, Paddington na Londres, pa mustra mundo henter nan di tres yiu. E fecha di 23 april a wordo anuncia cu Duchess of Cambridge lo duna luz y hopi hende tabata ansioso pa e yegada di e baby real. Sin embargo desde dialuna cu e baby a nace, e hendenan rond mundo ta ansioso pa sa ki lo bira e nomber di e yiu recien naci di Kate Middleton y prins William.
Despues di algun ora cu el a duna luz e Dukesa a estrena su baby den un shimis cora cu un kraag blanco di e diseñador Jenny Packham, rindiendo asina homenahe na prinses Diana, cu a bisti un diseño similar dia cu el a presenta prins Harry. E muts di e prins chikito recien naci tabata familiar esey door cu e ta mesun diseño cu prinses Charlotte a bisti pa su prome aparicion publico. E ta un version di e muts blanco di e tienda Spaño Irulea. E nanny di prins George y prinses Charlotte, Maria Teresa Turrion Borrallo, ta Spaño y e ta esun cu tin un rol den e escogencia di e outfit.
E sjaal blanco cu e baby real tabata lora den dje ta di GH Hurt and Sons, e mesun compania cu ta provee dekens pa prins George y prinses Charlotte. Pa loke ta e car seat cu e prins a wordo carga hiba den auto, tin un significacion special. E baby carrier cu un cover blanco ta crea pa Pasito a Pasito. Esaki ta un marca Spaño cu e prijs ta 65,90 euro. Den e carrier aki Dukenan di Cambridge a transporta nan baby recien naci cu tur seguridad for di Lindo Wing pa nan palacio.
