MARLIENNE LYDER TA SIGUI E CURSO “BAN PAPIA Y SKIRBI PAPIAMENTO MIHO”

   Durante su periodo como presentadora na Telearuba, Marlienne Lyder semper a sa di destaca den su forma natural, bunita y espontaneo durante e transmisionnan. E dilema a presenta momento cu Marlienne durante un transmision a menciona e palabra; ‘wakiendo’, y esaki a crea hopi reaccion negativo for di tur skina di Aruba. E temporada ey, Marlienne su comentario na FOCUS tabata cu loke ta di lamenta cu no e so ta unico presentador of locutor cu ta haci eror den uzo di nos dushi Papiamento. Cu kisas ta yega momento pa tur cu ta ehecuta e sort’i trabounan aki, ta mas consciente di uzo di nos idioma.
Su opinion despues di e controversia aki tabata, cu si bo ta traha den media bo tin cu haci bo miho esfuerso pa duna e ehempel di kico ta bon Papiamento.   E ehempel di kico ta bon Papiamento, tabata e iniciativa pa Marlienne sigui e curso ‘Ban Papia y Skirbi Papiamento Miho’. Desde cu el a inicia den media, esaki tabata algo cu e tabata interesa den dje. E ta bin di e generacion cu no a yega di haya les di Papiamento na scol. Semper el a papia y skirbi’e abase di loke cu el a scucha y lesa rond. Desafortunadamente, esaki hopi biaha no ta e Papiamento corecto. E pregunta na Marlienne; “Bo ta sinti ainda e efecto di e palabra wakiendo?” El a contesta: “(Hahaha)… Un tiki. Tur hende sa di e sucedido pero no tur hende sa ken ta e persona su tras. E ta pret pa scucha hende duna nan opinion, tanto positivo of negativo, sin sa cu ami ta esun cu a trece e palabra den luz publico. E efecto cu mas contento mi ta di dje ta, cu el a haci nos tur mas consciente di nos idioma. E ta leuk pa wak of scucha ora hende haci uzo di e palabra y di biaha nan ta coregi nan mes”. Marlienne Lyder y su co-host, Nen Flores, ta presenta “The Power Wake Up Show” di dialuna pa diabierna di 6or pa 8or di mainta na Power 101.7 FM. Nan ta purba di trece topiconan cu ta sea apart of cu ta conscientisa e oyentenan riba diferente tema, cu ta hopi varia cubriendo: cultura, deporte, mehoracion personal, bienestar. Nan ta contento cu e reaccionnan y cu e grupo di fiel oyentenan cu ta laga nan sa tur mainta cu nan tey hunto cu nan.