Un di e hende muhernan cu a subi arena politico den eleccion 2017, y ricibi un total di 982 voto riba su nomber, ta sinti ainda su curason ta yena cu emocion, ora e recorda e momento cu el a haya sa cuanto persona a deposita nan confiansa den dje. E confiansa cu el a ricibi como un hoben, hende muhe y pa prome biaha riba lista politico. E tabata un momento inolvidabel! E no tin palabra suficiente pa splica con agradecido e ta na cada un di e personanan aki, pa kere den dje y e kier pa nan sa cu e dia lo yega cu e por resona su voz como nan representante.
Gerlien Croes ta traha na Bureau Europesie Unie en Koninkrijk Relaties (Beuk) y manera semper el a keda activo socialmente y den comunidad aportando na organisacion- of personanan. E ta sigui duna su aporte na e desaroyonan positivo pa nos comunidad y pais, por ehempel; Fundacion Digna Lacle Herrera y Miss Teen International Aruba.
Gerlien ta invertiendo hopi tempo den su famia! El a comenta cu e sacrificio cu su pareha y yiunan a haci p’e, pa e por duna e miho di su mes na comunidad ta impagabel.
“Nos tin na cas nos mesun proyectonan di separa sushi cu nos yiunan, y alabes awor ta pasa mas tempo na veld di baseball durante siman y weekend. Awor no ta solamente mi pareha, pero tambe mi yiu homber mayor a cuminsa hunga baseball oficialmente”.
Su anuncio como candidato politico a trece un cambio grandi den su bida. Eleccion tabata un momento cu el a siña hopi mas cu e mes por a kere di su pais y nos comunidad. Durante e temporada el a sinti mas ainda di por saca e miho di su mes como persona pa por duna otro un man y un speransa cu lo tin un miho mayan. Gerlien tin algun proyecto den ‘pipeline’ pa loke ta e ‘empowerment’ di nos hende muhenan, cursonan via Fundacion Digna Lacle Herrera y tambe algun meta personal.
