Mayan ta tuma luga e certamen di Miss Teen Turismo Mundial, cu participacion di 15 candidata di edad entre 7 pa 19 aña. E certamen ta manera tur otro certamen internacional unda ta husga e basiconan manera; beyesa, inteligencia, bathing suit, gala, pregunta y esun mas importante ta e forum turistico unda cada candidata mester papia di turismo di nan país.
Esaki ta bira edicion No. 3 di e certamen y lo tin 15 candidata ta participa na e certamen cu ta paisnan manera; Aruba, Curacao, Venezuela, Haiti, Panama, Colombia, Guatemala y Peru. E mayoria di e participantenan na e certamen ta e candidata cu ta keda como ganadora of finalista di un certamen na su pais, y ta wordo apunta como representante pa Miss Teen Turismo Mundial.
E huradonan lo scoge e ganadora a base di nan entrevista cu ta importante y lo husga otro puntonan tambe manera e comportacion durante siman, puntualidad, forum turistico y e anochi di e certamen final mayan diadomingo den Aruba Marriot Ballroom.
Pa Aruba tin 4 participante den e categorianan di Little, Pre Teen, Teen y Miss, y segun Tio George cu e ta sigur cu Aruba ta representa den gran forma. Cada un a haya e guia necesario pa ta bon prepara riba escenario den nan presentacionnan.
E programa di actividad cu a prepara ta uno varia, cu photo shooting oficial, bishita na Parke Arikok y Casa Cuna, trip riba catamaran, bishita na diferente restaurant y finalmente e ensayonan pa e anochi final. E artista internacional Tony Arias lo haci su presentacion y tambe grupo di baile NTG. E spotlight ta riba e candidatanan cu ta bon prepara pa subi esenario y brinda tur hende un show di kita sombre. Éxito na tur candidata y specialmente na nos representanenan; Layefska, Nubis, Richelaine y Dalymar.
