E siman aki vakantie grandi ta cuminsa pa nos muchanan cu ta un temporada cu tur mucha tin derecho di disfruta optimalmente di dje. Mescos cu tur mucha tin derecho riba un nomber, nacionalidad, educacion y hopi otro derecho mas, un di e derechonan sumamente importante ta e derecho riba proteccion. Tur e derechonan di mucha ta ancra den un tratado di cua Aruba tambe ta forma parti di dje. Kiwanis Club of Aruba y Cruz Cora Aruba ta dos organisacion cu nan mesun identidad pero un di nan metanan principal ta pa yuda e comunidad a base di un concepto voluntario. Na e momento aki tur dos organisacion ta pidi ayudo bek di e comunidad door di sostene nan campaña contra varios tipo di abuso, mas tanto abuso di mucha: abuso sexual, abuso verbal y abuso fisico.
E campaña tin como lema NO SCONDE MAS, cu ta wordo sosteni door di varios persona cu diferente background y di edad varia manera ex-Gobernador Sr. Fredis Refunjol, Dr. Louise Rafael-Croes, Dr. Sharline Vis, Sra. Trudy Hassell, Sra. Janine Rodriguez, Sra. Shohaira Barnes-da Silva, Sr. Roderick ‘Rocco’ Franken, Srta. Sophie Petrocchi, Sr. Robert J’eandor, Sr. Zhyon Dania. Durante e vakantie grandi varios spot lo wordo pasa riba television, social media sosteni door di avisonan den corant. Banda di esaki varios interview cu expertonan riba e tema. Durante e luna di augustus e campaña lo continua cu varios presentacion den e barionan strategico duna dor di Dr. Rafael-Croes, Dr. Sharline Vis, Sra. Janine Rodriguez y Sra. Trudy Hassell.
Ban sostene hunto tur esnan cu ta vulnerabel den nos comunidad y cu no tin voz of sosten optimal. Si bo wak algo, raporta esaki na e instancia (nan) concerni.
