Dos cara conoci den tur locual ta trends di moda y evento, Lindy Croes y Glendeline Maduro, a forma duo pa presenta un evento special riba dia nacional di social media. Lindy tin su store cu ta preferi di hopi caba, Lindy Lifestyle Boutique, y Glendeline ta un influencer y tin su compania Aruba’s Proposal Planner.
E proyecto “Summer Styling” tabata manera cu bo ta den un walking closet grandi cu ta bin cu su mesun personal stylist. Di e forma aki Lindy a describi e concepto di e evento unda nan a duna cada cliente individualmente styling tips pa zomer. Nan a siña e clientenan con pa logra diferente look cu nan outfits manera; mix and match, color blocking, executive looks y party looks. Nan a duna tambe algun tips y tricks con por haci pa por haya un instant confidence boost cu bo vestuario.
Lindy Lifestyle Boutique a cumpli su prome aniversario y pa Lindy e ta un experiencia unico pa tin su mesun negoshi.
“Bo ta siña echt what it takes pa ta un entrepreneur, y asta siña haci cosnan cu no tin nada di e ramo unda bo ta aden. Mi a siña busca e modelo perfecto, hopi cos di fotografia, y e manera diferente di mercadia mi negoshi of un producto”.
Como entrepreneur, pa Lindy esaki ta significa cu bo mester siña di haci sacrificionan y tambe tin biaha bisa no y duna tempo na bo mes.
