Pa cuater aña consecutivo pa e luna di juli revista FOCUS ta highlight e temanan tocante; Salud, Beyesa y Bienestar. Desde comienso di aña nos a acerca Adrienne Fräser pa e ta riba e portada di e luna aki. El a caba di cuminsa algun siman atras cu su preparacion oficial pa su siguiente competencia, cu lo ta “Olympia Amateur 2018” na Las Vegas.
Adrienne ta comparti cu nos su receta preferi cual ta e Spinach Protein Pancake cu e ta prepara pa su breakfast. Entre 5 pa 6 biaha pa siman, Adrienne ta train y tin 1 dia di descanso. Asina mes riba su dianan di descanso e ta haci su cardio, cu ta varia di entre 1:30 pa 2 ora pa dia, dependiendo di kico e mester train cada dia. Desde e prome biaha cu Adrienne a competi (Augustus 2017) su nutricion y training ta den man di su coach Rene Wild. Hunto nan a siña conoce su curpa y metabolismo, manera nan dos ta bisa. Nan tur dos sa mas miho awor con Adrienne su curpa ta reacciona na cierto cuminda, y ki tipo di training/ehercisio ta mas efectivo. No ta 1 – 2 – 3 esaki ta bay! It takes ‘trials and errors’. Y den e deporte aki mas aun e consistencia tambe.
E por ta dificil y sigur na cuminsamento pa mantene un regimen di alimentacion, pero hamas imposibel. Segun Adrienne, e unico cos cu mas e lo rekeri ta un mind-switch, un control mental. E gana y perseverancia pa wak e cambionan y pa yega na bo meta (sea ta pa baha peso, mustra mas ‘lean’ of subi un escenario), mester ta mas grandi cu cualkier cuminda dushi cu bo por gusta. P’e durante competencia e alimentacion no ta su problema, pero ta su regimen di alimentacion despues di competencia ta mas dificil.
“Pero pocopoco bo ta siña… y pocopoco e ta bira un parti di bo bida, y e ta bira un manera di biba y bo ta custuma di haci escogencianan mas saludabel pa e efecto cu e tin riba bo curpa. E mester bira un Lifestyle… un healthy Lifestyle”.
Adrienne no ta mesun ‘lean’ ni na e mesun peso cu e dia cu el a subi escenario ultimo. Pero e no por ta asina ‘lean’ henter e aña tampoco. E ta un proceso y riba escenario ta un ‘moment-opname’ manera nan ta bisa. Y tur esey ta parti di e deporte. Naturalmente, miho bo mantene bo alimentacion despues den bo asina yama off-season, disfrutando di algun cuminda de bes en cuando, mas facil e lo ta e siguiente biaha cu bo mester subi escenario. Pero esey no kiermen cu Adrienne no ta biba saludabel. Y esey no kiermen cu e no ta bibando un ‘healthy lifestyle’.
