Duchess of Cambrigde a luci espectacular den su trahe color crema na e bautismo di su yiu, prins Louis, awe dialuna na Chapel Royal of St James’s Palace. E color ta similar cu e trahe cu e Dukesa a bisti pa e bautismo di su otro dos yiunan, prins George y prinses Charlotte. E biaha aki tambe el a bisti un trahe di un di su diseñadornan favorito, Alexander McQueen, cu el a combina cu un tocado di Jane Taylor y el a luci su cabey recogi den un moño.
E color a combina hopi bunita cu e paña di bautismo di su yiu, un bata di satin y canchi beige. E bata ta un replica di e shimis di e yiu mayor di reina Victoria na 1841. E original a uza pa ultimo biaha na 2004, awor e ta hopi delicado pa sigui uza y el a wordo reemplasa por un version nobo di Angela Kelly cu ta e ‘dresser’ di e Reina. E color creme, un variacion di blanco, tambe ta simbolisa inocencia, pureza, fe y paz, cualidadnan adecuado pa bautismo di un baby.
Hunto cu e famia real di cinco, Duke y Dukesa di Cambridge, prins George, prinses Charlotte y prins Louis, a compaña nan otro miembronan di e famia real. Sigur un yegada hopi anticipa ta di Duke & Duchess of Sussex. E dukesa a bisti un shimis color khaki berde di Ralph Lauren. Harry y Meghan no tabata entre e seis padrinonan di prins Louis debi ya nan tin un rol activo den bida di nan sobrino como omo y tanta. E Reina y prins Phillipe tabata ausente na e bautismo sin embargo William y Kate a conta cu e apoyo di e famia Middleton, prins Charles y Camilla, y e seis padrinonan di prins Louis.
