Luisa ta gusta aventura espontaneo, ta un bon mama, studiante y ‘baking’ ta su pasion. E ta timido, te ora cu e conoce un persona miho. Luisa ta gusta siña e cosnan nobo y ta un ‘quick learner’ y kier sigui studia, pa por bay mas dilanti cu ta posibel pa su yiunan; Hayley Syra (6) y Alia Francine (2). Luisa a acerca FOCUS pa conta su testimonio, ya cu ultimamente tin hopi hende famoso cu tambe ta sufri di problema mental y ta comete suicidio, manera; Inés Zorreguita cu ta ruman di Reina Máxima, Anthony Bourdain, Kate Spade y Avicii.
Pero no ta trata di djis hende famoso, paso aki na Aruba mes tin hopi hende cu ta sufri di diferente problema mental, entre otro; depresion y no tin niun instancia cu ta PAAZ y SPD pa yuda den e casonan aki. Na Aruba tambe varios hende a comete suicidio, entre otro un hoben di apenas 14 aña. Luisa kier kita e taboo cu tin na Aruba, unda cu nos hendenan ta pensa cu depresion y problema mental no ta existi. Incluso Luisa kier haci tur loke ta posibel, pa e hendenan cu ta sinti nan mes asina, por tin un hende of fundacion, cu si ta pone atencion na educa y scucha e hendenan.
Den edicion di FOCUS di juli, Luisa Ecury ta conta con for di su 8 aña cu su mayornan a echt cuminsa sinti cu no ta djis problema di mucha e tin, sino cu tin algo mas serio, paso e tabata rabia hopi lihe p’e cosnan hopi chikito. Pa hopi aña e famia a biba den un cas unda nan tabata cana riba ‘eggshells’. Cu su 22 aña el a haci un test di Merca, cu a sali cu e tin BPD y severo. Cu e test cu el a haci, nan no por a bin cu un plan di tratamento, y Lilah Wever di Wever Psycological Services a cuminsa traha cu ne. Luisa ta splica con e ta experiencia ‘Borderline Personality Disorder’ y di su deseo pa yuda otro persona cu ta confronta mesun situacion cu ne. Busca bo FOCUS di juli y lesa e entrevista completo realisa cu Luisa Ecury.
