Corina Rolfast (35) ta un dokter di cas nobo na Aruba y a nace na Corsou. Como persona e ta un hende cu hopi perseverancia y disciplina y ta stima su trabou como dokter y tin un ‘soft spot’ pa mucha y hoben. Corina su inspiracion ta for di chikito, ya cu su mama tambe tabata eherce e funcion di dokter di cas y como un mucha di 5 aña, e tabata sa cu e mester a traha duro pa por logra su meta.
Corina tabata wak con su mama tabata dedica hopi di su tempo na su pashentnan, yena di amor y hopi pasenshi. Loke su mama tabata comparti cu su pashentnan no tabata solamente e kehonan fisico, sino tambe e problemanan social, emocional y psikico. Cu su 18 aña di edad Corina a bay Universidad di Leiden na Hulanda pa studia medicina. Ora el a caba, el a traha 6 aña den hospital na e departamento di cardiologia, cuido intensivo y emergencia. El a gana hopi experiencia y conocemento durante e periodo ey cu el a traha den hospital, pero e tabata sinti falta di e parti personal di e profesion. P’esey mes el a scoge pa bira dokter di cas. Den edicion di FOCUS di e luna aki por lesa un entrevista hopi interesante cu Corina Rolfast di tur e desafionan cu un dokter di cas tin awendia.
