Diasabra awor den Marriott Grand Ballroom 10 candidata ta competi pa e corona di Miss Youth Aruba 2018. Esaki ta e segundo edicion di e certamen y segun e presidente di Miss Teen Aruba Foundation, Robin Croes, cu henter e anochi lo ta espectacular. Cada segmento lo ta algo unico riba su mes, sinembargo loke ta bay capta sigur mas atencion ta e opening cu e “angel wings”, pero tambe e segmento unda tur candidata lo subi stage cu un cancer ‘survivor’ di Mary Joan Foundation.
Tur aña ta dedica e certamen na un fundacion y e aña aki a toca Mary Joan Foundation, cual pa un aña largo nan lo traha cu nan pa yuda cu fundraising y otro proyectonan mas. E participantenan na e eleccion di Miss Youth Aruba 2018 tabatin un anochi di ‘kennismaking’ cu e cancer ‘survivors’ na e centro di MJF, unda tur a cera conoci cu e Señora asigna na nan. Y di eynan a cera un amistad unda tur candidata a traha di cerca cu nan y lo fungi como e voz di e Señoranan aki. “E tabata hopi great pa mira e candidatanan aki bay riba diferente ‘date’ cu nan cancer ‘survivor’ y nan por a conoce otro mas di cerca”, segun Robin Croes di Miss Teen Aruba Foundation.
E huradonan tin e tarea pa scoge e candidata cu lo ta un digno representante pa e hubentud di Aruba. Diasabra awor ta elegi Miss Youth Aruba 2018 hunto cu su finalistanan, esta 1st, 2nd, 3rd y 4th R-up y tambe Miss Youth Model. En total lo tin 22 diferente premio, entre otro; Elegancia, Best Body y Best Smile. E organisacion tin diferente certamen internacional cu por laga e representante di Aruba bay concursa, pero probablemente e ganadora lo bay Miss Teen Earth. E actual Miss Youth Aruba, Shanty Kanhai, lo baha corona pa su sucesora, y lo continua cu su preparacion pa bay representa Aruba na Ecuador den e magno certamen di Miss Teen Earth International. Nos ta desea hopi exito na tur e candidatanan y tambe na Miss Teen Aruba Foundation.
Fotografo: Suhaila Alders
