For di momento cu Nurienne Arias Helder a inscribi pa Miss Aruba, su escogencia tabata pa Miss Mundo. Un certamen cu Nurienne ta admira masha hopi mes debi na e proyecto; ‘Beauty With a Purpose’. E proyecto aki ta un parti importante di e certamen Miss Mundo, considera como e curason di e certamen, caminda cu e candidata ta realisa un proyecto pa y cu mucha na su pais, un proyecto cu mester impacta y demostra resultado. Como un hoben cu ta pro salubridad, Nurienne a opta pa organisa un ‘Healthy Kids Camp’ como su proyecto pa Miss Mundo. E vakantie di scol tabata un bon oportunidad pa Nurienne realisa e proyecto aki mirando cu tur mucha ta cu vakantie, pues un bon oportunidad pa educa nos muchanan riba e importancia di biba mas saludabel. Nutricion ta algo importante pa nos muchanan y por medio di diferente manera, Nurienne a splica esaki na e muchanan. Nurienne ta den preparacion fuerte pa e certamen di Miss Mundo cual lo tuma lugar 9 di december na Sanya, China. Como parti di su preparacion, Nurienne a realisa tambe un sesion di potret cu e fotografo internacional, Sergio di Francesco y asina presenta su potretnan oficial pa Miss Mundo. Nos por aprecia Nurienne basta activo den comunidad, y ta presente na varios actividad cultural y social. Nos kier a desea Nurienne tur clase di exito cu su preparacion y participacion na Miss Mundo.
