Recientemente e pareha hoben forma pa Jerwin Giel & Rahaida Wever a lansa oficialmente ‘1 Touch Response’. Un producto di alarma personal cu por scapa un bida. Un producto unico riba mercado aki na Aruba specialmente pa nos grandinan. Aruba su porcentahe di anciano ta halto y hopi ta prefera di keda cas en bes di drenta un cas di cuido. E alarma personal aki por ta beneficioso y cu un simpel ‘touch’ e por scapa un bida. E ta mas bien un alarma personal pa tene e famia trankil na momento cu nan ser keri ta na cas nan so. Un idea cu a nace cerca Jerwin Giel, bibando cu un experiencia cu su propio wela, un señora grandi di edad cu a kita cay den su cura di cas y keda benta abou pa 5 ora largo wardando riba un yudansa. Cu un primi riba e ‘1 Touch Response’, e melding ta drenta cerca 5 number di emergencia registra cu ta haci e yamada di emergencia. Jerwin ta splica tambe cu e alarma no ta solamente pa anciano pero por wordo uza tambe pa mayornan cu kier ta pendiente di nan yiu sin cu tin mester di duna un telefoon celular, cu un simpel primi, e mayornan lo wordo notifica cu e yiu ta den un emergencia. Tambe e alarma ta traha cu un sistema virtual cual ta wordo uza pa personanan cu problema mental of cu Alzheimer, cu ta te cierto cantidad di meter e pashent por cana nan so, manera cu e pashent surpasa su espacio virtual, esaki ta manda un señal pa e numbernan registra. E ‘1 Touch Response’ sigur ta un producto cu lo bay yuda scapa un bida of un persona den emergencia.
