Recientemente e diseñador di joyas y di e corona oficial pa Miss Venezuela, George Wittels, a wordo retira y no ta formando parti mas di e prestigioso certamen aki. Despues cu e organisacion di Miss Venezuela a haci un cambio completo den nan directiva, George Wittels no ta formando parti di esaki. Venezuela no ta pasando den su mihor momento y pa motibo aki tambe e organisacion a dicidi pa bini cu cambio. Pa algun e cambio tabata di sorpresa y pa otronan e tabata na su lugar. Jacqueline Aguilera (Miss Mundo Venezuela y Miss Mundo 1995), Directora di Imagen pa Miss Venezuela a anuncia cu e diseñadora Mila Toledo (Miss Dto. Federal – Miss Venezuela 1980) a keda apunta como esun encarga pa e corona y joyanan di Miss Venezuela, consecuentemente e aliansa entre Miss Venezuela y George Wittels a keda cancela. Den un rueda di prensa, George Wittels a anuncia cu despues di 27 aña Miss Venezuela lo bay tin un diseñador nobo, cual ta un desicion na su lugar pero ta lamenta cu su persona a lesa e noticia di su retiro riba medionan social. Como e diseñador ‘oficial’ pa e certamen pa 27 aña, a spera di por a ricibi un comunicado oficial pero esaki nunca a socede. Expectativanan ta halto pa wak ki corona Mila Toledo lo presenta pa Miss Venezuela 2019 como tambe e joyanan pa e siguiente concursonan internacional venidero di cada representante.
