E ultimo simannan tabatin varios enlace matrimonial di parehanan conoci y entre nan e flamante Miss Aruba 2006, Melissa Laclé y Jonathan Croes. Nan ceremonia civil tabata diahuebs 2 di augustus y diasabra ultimo nan a ricibi e bendicion nupcial na Misa Sta. Filomena na Paradera.
Manera nos a anticipa cu Melissa Laclé lo bay luci manera un berdadero princesa y esaki a keda resalta momento cu el drenta misa den su precioso shimis di bruid y cu su corona impresionante cu a pone e toke real. Igualmente Jonathan Croes a bisti un trahe elegante y clasico di un diseñador Italiano. E mesun estilistanan cu a haci e styling di Melissa pa e ceremonia civil, a crea e estilo pa e luci pa su enlace eclesiastico. E pelukero Elias Ordoñez a realisa un peinado clasico elegante y e makeup artist George Bislip a resalta aun mas e beyesa di Melissa cu su makiyahe.
Despues di e ceremonia religioso a sigui e celebracion den un ambiente di cuenta di ada, manera e invitadonan a describi e fecha special den e bida di Melissa y Jonathan. Un decoracion espectacular, unda a resalta e detayenan di e feliz pareha Croes namora, 3 banda musical cu a sa di entretene e invitadonan y presentacion special di e cantante famoso Dongo. Sin duda, un celebracion di kita sombre, unda e pareha a disfruta plenamente di nan dia yena di amor eterno pa otro.
