E tan anticipa proyecto di Fundacion CINEARUBA esta Ciudad Oraño finalmente ta ricibi su primicia den un forma hopi special. Den estilo di tapijt cora na Crystal Theatre lo duna elogio na mas di cincuenta talento local cu a forma parti di e produccion di ficcion Ciudad Oraño. E produccion a nace for di un storia cu Juan Francisco Pardo a skirbi na 1992. E ta consisti di articulonan di corant tocante sucesonan unda cu hobennan tabata envolvi. Loke mas ta resalta ta cu bintiseis aña despues e problemanan social a keda mescos y te hasta nan bira pio. E storia a ricibi un ahustacion pa por fit den e era digital di social media.
Na 2015 fundacion CINEARUBA a dicidi di forma un club di actuacion hubenil, e Into Acting Youth Club, cu e meta di provee desaroyo personal, desaroyo di talento y desaroyo di habilidad. E club ta basa riba e enfoke internacional di Desaroyo Positivo di Hubentud cu ta un programa cu ta educa y involucra hobennan den actividadnan productivo. E hobennan di e club a prepara durante un aña pa Ciudad Oraño. Mas di cien pagina di script nan mester a siña for di nan cabes.
November 2016 e grabacion di Ciudad Oraño a inicia. E grabacionnan a wordo planifica segun e localidadnan, esey a haci cu tur escena a wordo graba acronologico. E sistema aki ta spaar mas tempo, pero e ta pone e capacidad di e actornan pa memora na prueba. Haci ficcion ta un arte riba su mes, e ta rekeri asina hopi pa logra capta e esencia y e sentimento door di un glas riba un carchi memoria den un camera. Mescos cu e actuacion ta importante, asina tambe ta tur otro cos cu ta completa e imagen. For di vestuario, decoracion, peinado, makiyahe, camera, iluminacion, zonido y direccion. E ta un trabou colaborativo.
E postproduccion di Ciudad Oraño a tuma hopi tempo y ta un produccion grandi pa un isla asina chikito unda cu e fondo pa arte visual no ta algo facil. Esey tambe a haci cu e proyecto a wordo parti den fasenan. Algo asina ‘ki nunca a wordo haci na Aruba. E ta demostra cu Aruba tin talento y cu e ta rekeri pasion y dedicacion pa apesar di tur e limitacion cu Aruba tin pa toch haci algo cu nunca a wordo haci.
