Un pelukero y makeup artist cu a pesar cu el a muda pa Corsou semper a keda den contacto cu hopi di su amistad- y clientenan na Aruba. Lenyn Linares a traha na Aruba for di 2003 te 2006, y su cambio pa bay Corsou tabata positivo aunke e tabata motiva pa e procesonan di inmigracion den e temporada ey. Aunke el a yega di bishita Corsou un biaha, e nunca por a pensa di establece eynan, y segun Lenyn su palabranan; “Fueron circunstancias de la vida”. Awendia Lenyn ta doño di Celo’s Integral Beauty & Spa cu el a inicia na aña 2009.
Lenyn ta corda cu na aña 2005 tabatin un intervencion di Ministerio di Husticia y Inmigracion pa motibo di supuesto fraude den e procesonan di permiso. Esaki a afecta su permiso di estadia y door cu e no tabata kier a cay den status di ilegal, el a acepta pa bay Corsou mientras e tabata spera e cambio di permiso. E oportunidad a surgi e momento ey pa inverti como socio den un salon cu ya tabata existi, pero despues di 3 aña den sociedad el a dicidí pa bay riba su mes. E no ta arepenti di a inicia cu Celo’s Integral Beauty & Spa, pasobra el a hacie crece como persona y tambe yuda forma su mes como un empresario.
Un bunita experiencia sigur tabata for 2014 pa 2017 cu Lenyn a traha cu e organisacion di Miss Curaçao. El a haya e tarea y responsabilidad di STYLE e Miss Curaçao prome cu nan bay Miss Universe. Cu Kanisha Sluis, cu a sali den top 10 Miss Universe 2015, e acercamento tabata otro paso e no tabata conoce sino te dia di presentacion na Prensa. For di e dia ey el a hala su atencion y e no sa con of via di ken cu nan a drenta den contacto cu otro. Lenyn extra ofisial a haci su cabey y makeup den varios ocasion prome cu el a sali Miss Curaçao. Acualmente Lenyn ta haciendo dos estudio cu marcanan di beyesa internacional pa e certifica y bira un International Hair & Color Artist.
