Presenta cada aña un tema diferente y logra causa un impacto grandi cada biaha, ta demostra cu ademas di creatividad tambe tin e esfuerso di un team grandi su tras. Kiwanis Club of Aruba como e club di Kiwanis cu mas aña na Aruba, ta presentando ya durante 30 aña su evento anual pa recauda fondo pa e comunidad. Esaki ta un anochi unda cada persona ademas di contribui pa un bon causa, ta experiencia un anochi glamuroso y yena di diberticion.
For di ayera caba por a mira cu nan a cuminsa cu e parti di decoracion di Dubai Wine Gala den Renaissance Convention Center, unda cu House of Mosaic a instala un tent estilo Arabe. Aki bou lo bay tin varios atraccion manera henna tattoo painting pa Eshita Asrani y tambe e virtual reality. Mientras cu paden por disfruta di e atraccionnan bou di e tent, e parti pafo na entrada tin e Hookah Lounge unda por huma tabaco treci special for di Dubai y Jordania.
E bandanan cu lo bay tey awe nochi pa entretene e publico ta; N’Fusion, Buleria, Blue Boulevard y hunto cu nan e tan gusta DJ Edson Tromp. E anochi di baile aki lo tin su highlight ora cu e belly dancers subi e pista cu nan baile espectacular. Si por imagina e ritmo di e baile mientras e video mapping crea pa Egmar Irausquin ta projectando, esaki ta un innovacion simplemente fenomenal.
E buffet tin un seleccion exkisito di cuminda di e arte culinario Arabe y como dessert lo sirbi e dushi Baklava. E “wine stations” cu e seleccion di e miho biñanan di e diferente casnan, sigur awe nochi atrobe lo un centro di atraccion. Lo tin varios premio y e main door prize ta un travel voucher balora na AWG 2,500.00 caminda e ganador por scoge e destinacion di su gusto. Finalmente e anochi tan spera a yega y esunnan cu tin nan ticket sigur ta bay disfruta di un evento top!
