Nos actual Miss World Aruba, Srta. Nurianne Arias Helder, ta preparando grandemente pa representa nos isla na Miss World na Sanya China. Nurianne ta un persona cu for di chikito tabata modela y tambe a yega di competi den eleccion di Reina Infantil di Carnaval, Little Miss Universe y tambe Princesita Modelo. Sin embargo despues como hoben Nurienne a pone tur loke ta certamen un banda pa asina enfoka riba su estudio cual el a caba cu exito tanto na Aruba como na Hulanda.
Awor Nurianne ta cla pa sigui aporta na crecemento y desaroyo di nos mucha- y hobennen enfocando hopi riba e tema di salud, y aki ta unda e gana di por participa den e certamen di Miss World pa e por vocifera su pensamento encuanto salud mundial. For di hopi jong caba Nurianne tabata activo den diferente organisacion unda e tabata fungi como voluntario. Algun aña atras Nurianne mes a sufri un condicion di salud cual ta diabetis y aki mas ainda kier a enfatisa riba e importancia di salubridad den cada pais. Pa su proyecto di “Beauty with a Purpose”, Nurianne a crea un fundacion cual ta “Speak Your Heart Foundation” y pa medio di e fundacion aki lo recauda fondo pa asina yuda principalmente e muchanan. Lo haci tambe research y duna asistencia monetario pa un miho calidad di bida, e prome proyecto ta pa yuda e hobencito Ethan di apenas 3 aña, cu ta sufri di un malesa di cuero y ta e unico mucha na Aruba cu tin e malesa aki cual ta yama Epidermolysis Bulosa (EB). Nurianne tin un campaña di Sticker cual e ta bendiendo pa 5 florin pa sticker y ta pa yuda Ethan y su mayornan.
Diabierna awor lo tin benta di Sticker na Linear Park y Nurianne cu su crew mes lo tey pa asina tur hende por aporta na e causa aki. Si tin companianan cu ta interesa den compra di e stickernan aki por yama 5616151 of 5932350 y lo deliver e stickernan te na oficina. Tambe dia 1 di November na The New China Club, Nurianne lo tin cu “Fundraising Gala Dinner and Auction Night”. Durante e anochi aki lo tin algun item cu lo haci auction y lo start na 100 florin. Lo tin algun cuadra, brunch, fotoshooting y algun item mas. E fundraising Gala Dinner tambe tin un costo di Afl. 100,00 y esey ta encera snacks, fefreshments y dinner. Durante di e evento aki lo mustra algun di e trahenan cu Nurianne lo hiba Sanya. Si ta desea di cumpra ticket pa sostene nos candidata por yama 5616151 of 5932350 pa asina aparta bo kaarchi y forma parti di un anochi unico y special. Nurianne lo ta biahando dia 7 di November y nos ta desea di awor caba tur clase di exito.
