E diva Angela Baidez ta bek na Aruba cu varios proyecto artistico di arte, como diseñadora di interior y pronto e ta cuminsa canta na Bohemian Bar & Restaurant, cu su Show di Rumba Flamenca. Su yiu muhe Zanelti lo ta hunto cu ne den e show y pa Angela esaki ta un regalo di Dios, cu e ta disfruta cada bes mas. Otro sentimento di felicidad como mama cu e no por splica cu palabra ta, cu pronto su yiu Sidey lo bira tata.
Nos por defini Angela como un artista multifacetico, cu ademas di ta conoci como cantante, ta desplega su talento den arte plastico y decoracion di interior, cu e ta haciendo profesionalmente pa dos aña caba. Na aña 1983 hunto cu e Duo Escarlata, Angela a bin duna presentacion na Aruba, unda el a namora y despues a forma su hogar aki, despues cu el a casa. A pesar di su fama, loke cu e hendenan semper a aprecia di Angela ta, cu el a keda un persona calido y cordial. Si e mester scoge entre locual e ta haci e ta prefera di pinta y decora, paso pinta ta trankilise y decora ta pasione! E parti di e proceso cu mas e ta gusta den ehecucion di cada un ta cu e pintura, e tin e facilidad di expresa mas ainda tur loke tin dentro su ser. Cu decoracion ta manera e ta hunga den un cas cu e mueble- y acesorionan, mirando y dunando sentido na e bista. Den e FOCUS di october por lesa e entrevista di Angela Baidez y tambe su tips di decoracion.
