Recientemente e hoben artista Jonathan Thiel miho conoci como Jeon tabata parti di un paseo na varios scol riba nos isla. E paseo aki tabata tin como meta principal pa comparti experiencianan y lesnan di bida di Jeon na nos hubentud escolar. Tambe a probecha pa asina invita e hubentud pa bin mira e espectaculo mas grandi cu Jeon a yega di duna Aruba durante ‘Island Takeover Festival”. E concierto aki lo tin presentacion di J Balvin, Bad Bunny, Alex Sensation y Jeon mes entre dia 1 pa 4 di November 2018 riba nos isla na Harbor Arena. E scolnan cu Jeon a bishita tabata Juliana School, Maria College, Mon Plaisir College, Colegio San Antonio, EPB Oranjestad, SPO Santa Cruz y EPB San Nicolas. E artista acompaña hunto cu algun otro amigo musico a conta su experiencia y lesnan di bida, pa asina stimula e hobennan den nan trayecto escolar. Naturalmente algun tono musical no a falta. Jeon a conta cu e mes a sali for di scol na un edad hopi hoben y despues a arepenti esaki masha hopi. El a sigui splica cu ta importante pa e hobennan haci tur nan esfuerso durante e temporada di scol pa por prepara nan pa un mihor futuro.
Despues cu Jeon a ripara cu su decision no tabata esun mihor, el a drenta scol bek y a logra caba su scol pero na un edad mas halto cu un hoben cu si a sigui su trayecto di scol regular. Jeon a stimula e hobennan tambe pa kere den nan mes y ora cu nan haya un inspiracion den nan bida pa pusha pa por logre. Loke bo pone den bo mente y curason bo lo logre, tabata un di e mensahenan fuerte di Jeon. Tanto e studiantenan como tambe e docentenan a aprecia cu Jeon a tuma su tempo pa asina papia cu e hobennan. Na varios scol den klas por a mira cu e hobennan tabata hopi entusiasma cu Jeon ta den nan klas. Gritonan di alegria y sacamento di selfie tabata acompaña tur e bishitanan. Na final di e sesion Jeon a regala algun ticket y a invita e hobennan pa ta presente na e festival den luna di November proximo. Passes pa e festival ta na benta na Citgo Boulevard, Citgo Palm Beach, Citgo Essoville , Superfood y AITO Pop Up Store na Renaissance Marketplace. Por scoge entre seccion general (AITO General Pass, VIP Standing (AITO VIP Pass) y mesa VIP. Pa tur informacion tocante mesa mester yama 569-6446. Pa mas informacion por bishita www.islandtakeover.com of www.facebook.com/islandtakeover
