Fin di siman ultimo riba e dianan 27 y 28 di october, The Boolchand Group na Aruba a participa den varios actividad relaciona cu recaudacion di fondo pa Mary Joan Breast Cancer Foundation. Diasabra dia 27 di october PANDORA Aruba (ambos tienda di PANDORA) a organisa su “Party for Pink” unda 10% di e benta di dia a wordo duna na Mary Joan Breast Cancer Foundation.
Henter Aruba a wordo cordialmente invita pa bin cumpra nan joyanan di PANDORA pa contribui cu e donacion na Mary Joan Breast Cancer Foundation. Pa mustra nan sosten e empleadonan a bisti na ros y a decora e tienda bunita na ros cu blanco. Riba un mesa decora den e mesun tononan di e tema, a ser poni cos dushi dorna cu e strik ros di cancer di pecho, y juice pa tur e bishitantenan di PANDORA. Tur e esunnan cu a bishita PANDORA Aruba a haya e oportunidad tambe pa participa den e rifa, unda cu e premio tabata un armband di cuero hunto cu un charm di e tema di cancer di pecho. E feliz ganador di Oranjestad tabata sumamente conmovi como un sobreviviente di cancer di pecho. E ganador di Paseo a hura pa semper keda cu e armband y asina aporta na e bunita causa. Diadomingo dia 28 e personal di The Boolchand Group incluyendo Boolchand’s, PANDORA y Havaianas a participa na e Pink Walk pa yuda recauda fondo pa Mary Joan Breast Cancer Foundation.
