Biblioteca Nacional Aruba ta presenta otro edicion di su Festival di Buki pa Mucha. Actividadnan di Festival di Buki pa Mucha 2018 ta den luz di e tema ‘Amistad’. E aña aki e lema ta ‘Amistad! Traha storia hunto. Comision di e festival ta produci un buki pa mucha specialmente pa e festival. Un buki cu lo bay na e scolnan participante. E aña aki ta produci un compilacion di 15 storia. Cada storia a keda ilustra pa artista visual Vanessa Paulina. Vanessa a crea tambe e imahen di e festival cu ta expresa e tema ‘Amistad’.
Bishita pa scol: Den siman di dia 5 pa dia 9 di november un grupo di autor di buki pa mucha, ilustrador y contadornan di storia ta bishita mas o menos sesenta scol, primario, basico y special, riba nos isla. Nan ta bishita scol pa conta storia, papia tocante buki cu e mucha y pa stimula e mucha pa lesa locual ta esencial pa su educacion.
Un buki gratis pa tur mucha: E ‘Regalo di siman di Buki pa Mucha 2018’ ta un regalo pa muchanan di Aruba. Por haya e buki gratuitamente na tur libraria ora cumpra un buki pa mucha, tanten cu tin.
Biblioteca Nacional Aruba ta contento y orguyoso di por presenta e buki di Festival di Buki pa Mucha. E buki titula ‘Amigonan tur caminda’ ‘Overal vrienden’ ta na Papiamento y Hulandes . Esaki ta un compilacion di storia di diferente escritor di storia pa mucha. Traduccion tabata na encargo di sra. Lilian Semeleer y Angelique Maduro y redaccion di Jeroen Hoogerwerf. E buki a keda publica na Levendig Uitgever.
E buki ta un compilacion di storia di Richard Dabian, Robert Reeberg, Reginald de Palm, Sergio Tjie-A-Loi, Gino Vrolijk, Alvin Inecia (Tio Ali), Crisen Schorea, Daniëlle Schothorst, Denise de Jongh-Rekwest, Diana Marchena-Martes, Evelien van Dort, Indra Hu-Ramdas, Jeroen Hoogerwerf, Liliana Braamskamp-Erasmus y Mariska Hammerstein. E ta yen di storia pa mucha di scol basico. Storianan di amistad entre mucha, bestia, hende di diferente cultura. ‘Amistad’ ta e tema di e Festival di Buki pa mucha e aña aki.
