Kiwanis Club of Aruba ta lansa e proyecto di adorno di Pasco. Un idea y iniciativa cu a inicia aña pasa pa miembro di Kiwanis Club of Aruba, e tempo ey Lieutenant Governor di Division 26 di e Eastern Canada and The Caribbean District di Kiwanis International den persona di Giantonio Muller.
Kiwanis Club of Aruba ta continua cu e proyecto den luna di november y december. E meta principal di e proyecto di adorno di Pasco ta, pa recauda fondo pa e Fundacion “Ban Uni Man Pa Cria Nos Muchanan”. E fundacion aki ta percura pa algun aña caba, pa e muchanan di poco recurso, haya algo di come tur mainta na scol mes y asina aporta na nan prestacion na scol, ya cu desayuno ta keda un alimento di sumo importancia.
E adorno di e aña aki tin un diseño unico caminda por wak 4 mucha rondona pa e bandera di Aruba. E adorno di Pasco a keda diseña pa Concept Creations y fabrica na Colombia. E pueblo di Aruba tambe por forma parti di e bunita proyecto aki, door di contribui cu un donacion di AWG 25,00 pa Fundacion “Ban Uni Man Pa Cria Nos Muchanan” y a cambio lo ricibi un decoracion unico di Pasco. Por tuma contacto cu cualkier miembro di Kiwanis Club of Aruba pa asina haci donacion y ricibi e adorno di Pasco unico aki. Por tuma contacto tambe via di e pagina di Facebook di Kiwanis Club of Aruba of por manda un email na [email protected] como tambe na CITGO San Nicolas, CITGO Wayaca, CITGO Santa Cruz, CITGO Sasaki, Red Sail Sports y Taste Buds restaurant na Do It Center.
Kiwanis Club of Aruba ta gradici e comunidad y e comerciantenan di Aruba, cu semper a duna apoyo y sosten na tur e proyectonan cu Kiwanis Club of Aruba ta realisa durante aña pa e muchanan. Danki pa yuda Kiwanis sigui aporta y yuda comunidad y specialmente e muchanan cu ta nos futuro.
