E ultimo simannan Rotaract Club a lansa cada un di e weganan, cu lo ta parti di e evento grandi diadomingo 25 di november for di 1’or pa 5’or di atardi na Club Caiquetio. E evento “Pasa Pret cu Rotaract” ta wordo organisa den conexion cu e Dia Internacional di e Proclamacion di e Derechonan di Mucha di Nacionnan Uni.
E variedad di e actividadnan dibertido pa e muchanan a ser presenta den un forma artistico y innovativo pa Zia Alexia Habibe. Aunke cu na Aruba esaki ta prome biaha cu e ta trece su talento dilanti pa e actividad organisa pa Rotaract Club of Aruba, Zia atrabes di su social platform tabata hopi popular cu mas di 50 mil followers riba Instagram. Sin embargo el a duna prioridad na su estudio na Universidad di Aruba, y el a pone su account dormant. E pinturanan cu e ta post riba su Instagram ta ricibi centenares di LIKES y esaki a crea e oportunidad pa e wordo acerca pa forma parti di un publicacion internacional di arte. Dos di su pinturanan a ser escogi pa ta den e magazine aki cual e ta sintie hopi orguyoso pa su logro.
Zia Alexia ta un ‘prospect member’ di Rotaract Club of Aruba y el a realisa e artenan aki cu hopi amor pa e actividad di “Pasa Pret cu Rotaract”. Algun di e actividadnan ta e Careda di Bulamento den Saco, Careda di Douw, Mik y Tira, Bowling, Huki di Arte, Face painting, Photobooth, Careda cu Cuchara y mucho mas cu lo tini pa asina e muchanan por hunga activamente. Na final di tur e weganan, tur mucha ta haya e oportunidad pa busca un regalo den e grabbelton. Bar y cushina lo ta bon surti na prijs di famia y tambe lo tin e stand di Pofferdorie presente bendiendo hopi cos dushi di come y refresca.
Esaki ta e di cinco edicion di “Pasa Pret cu Rotaract” cual ta un feria gratis yena cu wega y actividadnan dibertido pa mucha di tur edad. Sint & Piet tambe lo t’ey presente pa 1’or di merdia pues ta conseha pa tur hende yega trempan pa por disfruta di esaki, tambe lo tin un Bouncy House, Grupo di Baile, Musica di DJs y artistanan invita Zyon, Wichi y Ty pa muchanan por disfruta. Aña pasa e evento tabata sigur uno exitoso cu a trece hopi felicidad den tur mucha cu a participa, kende realmente a haya un oportunidad pa hari hopi y pasa pret cu otro.
