Den presencia di miembronan di prensa, representantenan di KWF (Koningin Wilhelmina Fonds) y invitadonan di honor cual tabata e landadornan di Crossing For Hope, Caribbean Mercantile Bank a presenta un bunita gesto diabierna merdia por medio di ‘match’ e suma inicial recauda durante di e evento di Crossing for Hope entrega na KWF.
Den cuadro cu e hazaña exitoso di 11 di november 2018 ‘Crossing For Hope’ unda cinco landador di Aruba a landa di Venezuela pa Aruba, diabierna atardi Caribbean Mercantile Bank a ‘match’ e suma di 30.000 florin di locual a wordo recauda pa Koningin Wilhelmina Fonds. “Palabra no tin pa gradici”, presidente di KWF Lilian Prince a expresa. Ta gradici e landadornan y sr. Rolly Bislik pa tur e esfuerso pa haci e campaña aki un exito.Koningin Wilhelmina Fonds ta actualmente opera for di Oranjestad pero nan kier expande pronto pa bay San Nicolas. “Tin hopi hende malo pariba eynan y nos kier t’ey pa nan cu nos facilidadnan”, sra. Prince ta bisa.
Wilhelmina Fonds ta conoci pa ta un fundacion cu ta haci hopi pa nos hendenan den comunidad cu ta sufri di cancer. Tin un parti di e fundacion cu ta completamente ekipa cu cama y tur cos cu por uza na hospital pa haya e cuido adecuado di enfermeranan diploma.
Tur locual e fundacion aki ta haci ta gratis, tur esnan cu ta traha den e fundacion ta boluntario. Es decir, nan gastonan no ta wordo cubri cu nada y cu mil amor nan ta haci e trabao aki pa comunidad di Aruba. E fundacion ta satisfecho y contento cu e tremendo apoyo di CMB. “Pasobra shonnan, na cua porta cancer no ta bati? Y esey ta e dolor di mas grandi cu tin. Como directiva, mirando awe loke nos a haya akinan, nos ta bay uz’e hopi bon”, sra. Prince ta comenta.
‘Den tur union tin forsa’
Un bunita produccion tambe a wordo presenta diabierna merdia den sala VIP di The Cinemas Renaissance Market Place. E produccion/video aki ta uno cu ta encera un mensahe di fin di aña cu CMB kier a trece dilanti pa henter pueblo di Aruba. E video aki tambe ta refleha e ‘pa kico’ e hazaña aki a wordo haci na prome luga. Javier Wolter, General Manager Director di CMB a felicita sr. Roly Bisslik kende ta e cabes tras di e hazaña aki y tabata e prome cu a logra di landa entre Venezuela y Aruba 20 aña pasa. E produccion lo keda publica oficialmente diabierna anochi via television y rednan social.
