For di dia 5 di januari Hannah Arends a sali rumbo pa Manizales, Colombia pa representa Aruba na e Reinado Internacional del Café. E ta e prome certamen di e aña aki y e paisnan participante ta mas tanto paisnan di Latino America. E concursantenan mester tin hopi conocimento di koffie mirando cu nan ta celebra koffie. Aki ta unda Hannah ta bon prepara den tur locual ta e historia di koffie na Aruba, pero tambe con Aruba lo por promociona koffie mundialmente.
Den un combersacion cu Endy Croes, el a informa FOCUS cu Hannah a wordo prepara door di un team cu el a encabesa y unda el a keda encarga cu pasarela, oratorio y su shimis oficial. E certamen tin un duracion di un siman y ta parti di e Feria de Manizales. Durante e siman aki ta haci hopi promocion pa Manizales unda e aspecto di koffie ta keda principal. Hannah mester a prepara un receta original cu e mester a presenta, cu ta parti di su presentacion na Colombia y cu a bay hopi bon. Loke Hannah mes ta experienciando ta, cu e ta hayando hopi bon reaccion di e prensa. Eynan hopi atencion ta wordo poni mas tanto pa Colombia, Puerto Rico,Venezuela, Brasil y e ta hopi sorprendi pero honra cu Aruba tambe ta haya hopi apoyo.
Ayera nochi a tuma luga e eleccion di polis unda cu e cuerpo policial di Manizales a scoge Aruba den e Top 3 Finalista hunto cu Colombia y Puerto Rico. E ganadora principal a keda Colombia pero ta bunita pa mira cu Aruba ta resaltando y ta hayando atencion na Manizales, Colombia. Awor ta sperando riba e anochi final cu ta diasabra awor. Por sigui Endy Croes su facebook pa tur informacion relaciona cu e participacion di Hannah Arends na e eleccion na Reinado Internacional del Café. Ultimo biaha cu Aruba a clasifica ta tempo cu Larisa Leeuwe a clasifica den top 5 di e certamen.
