Nos Mrs. Carnival 2019 a sintie super feliz riba escenario dia di Eleccion di Reina. E sentimento di alegria cu porfin e dia a yega pa haci su presentacion, aunke net riba e dia aki di eleccion Clarissa a bira malo. Apesar di su malestarnan, dolor y cansancio, el a ‘make the best out of it’! Esey tabata e motibo dicon na final casi e no por a baila mas, cual a crea basta speculacion riba facebook di comentarionan cu no tabata cuadra cu berdad.
Clarissa a participa na 1998 na Eleccion di Reina di Carnaval representando Mariniers Kazerne. E tabata semper activo den carnaval sea yudando e reinanan of e gruponan di carnaval. El a yega di competi den roadmarch cu Youth Extreme, baila pa e cantantenan y tambe canta cu banda den carnaval. E tabata aña pasa den e comision di Roadmarch Infantil- Hubenil. E amor pa nos carnaval ta grandi p’esey tambe el a prepara duro pa e Eleccion di Sra. Carnaval. Su team di experto a consisti di Maribel Andrade, Mitch Almary, Elsa Krozendijk y Marisol Peña.
Clarissa a logra realisa un presentacion impactante y luhoso danki na e fondonan cu el a recauda durante1 aña largo bendiendo rifa y cuminda. Su esfuerso pa mira su soño ser realisa luciendo un kostuum espectacular di Andrew Curiel y un shimis ful di spiel di diseñador internacional Alejandro Fajardo. Un parti hopi emocional pa Clarissa tabata na comienso cu e por a wak e sernan, cu ya no ta na bida mas den su show. E momento cu e Prins & Pancho a hisa su mannan na laira, e tabata contento apesar cu su curpa no tabata duna mucho mas.
E team completo di Clarissa ta consisti na prome lugar di Papa Dios, su pilar cu ta su mama, su famia, Gareth Tromp, Lisette Tromp, Maribel Andrade, Andrew Curiel, Zylena Todd y famia, Candy Maduro, Isatis, Darren, Queeny y ful e Team di Empire. Clarissa Arrindell su mensahe ta, pa tur loke bo kier logra ta posibel, traha duro p’e apesar cu e caminda lo ta duro y largo sin embargo e no ta imposibel. Gradici Dios pa tur cos aunke tin cosnan cu lo no ta manera bo kier, pero gradici’E paso bo a siña algo di esey, y E sa e miho pa bo. Finalmente Clarissa kier gradici su hefe y trabou, cu a coopera asina bon cu ne cu tur cos.
