E di dos mucha muher na Aruba cu a converti den e REINA DOBEL CORONA ta Maristella Geerman, cu a carga e corona como Reina Hubenil na aña 1977 y despues corona como Reina di Carnaval 1984. Ambos corona pa Maristella ta significa e union di hopi hende cu alegria: su famia y amistadnan. Algo cu e no por a imagina ta, cu a uni asina hopi hende cu nunca e tabata conoce despues cu el a presencia esaki durante e paradanan di carnaval.

Maristella ta conta FOCUS cu e tempo ey hopi cos tabata simpel y e mayornan no tabatin e peso di e gastonan halto. E casnan tabata disponibel pa traha banners cu payette, glitter y tambe ponponnan mientras e hendenan tabata ofrece boluntariamente pa yuda, cual a haci cu nan mes a traha hopi material di apoyo. Pa eleccion di Reina Grandi, e negoshinan a sponser 2000 T-shirt y club hunto cu e organisadornan a yuda financieramente cu su shimis ademas di pone busnan disponibel na Sta. Cruz pa tur hende cu kier a apoye. Esaki tabata pa Maristella un union super sano y yen di alegria.

E persona cu a acerca Maristella pa bay pa Reina tabata Rita Werleman. E mes a percura pa e training tanto di speech, baile como tambe con pa cana y Maristella a haya training tambe pa stadion di esunnan encarga di parti SAC. Maristella ta corda ainda su presentacion riba escenario cu su bailamento elegante mientras e tabata wak e huradonan den wowo. El a haci manera cu el a wordo siña con pa e saca su man pa zwaai cu elegancia y mester a percura pa hari di cuminsamento te fin, cu su lipnan a seca y pega riba djente, y cachete tabata cuminsa tril di cansancio di hari durante un eleccion unda tabatin hopi candidata e tempo ey riba escenario.

E mama di Maristella mes a cose su shimisnan pa ambos eleccion cu e tempo ey tabata blanco. Pa Eleccion di Reina Grandi e show tabata super simpel unda dos cabayero den tuxedo a trece Maristella dilanti y a kita un mantel fini di chiffon cu un boa roos, y un mucha jong tabata balia cu un bouquet di flor. Pa parada grandi a haci e shimis mas cortico pa e por a bisti un sapato cu poco hilchi door cu el a habri parada cu un roadpiece di zonnebloem. Maristella no a habri parada na e manera tradicional riba un carosa y esaki tabata danki na un persona hopi lief, Shirley Croes, cu a ofrece gratuitamente pa uza su roadpiece door cu el a bira malo y no por a participa mas den carnaval.

Riba e pregunta si el a sinti presion pa eleccion di Reina Hubenil vs Reina Grandi, el a bisa: “E presion pa gana Reina di Carnaval no tabata asina hopi, claro cu e grupo kier pa habri e parada, pero e gana di gana door cu ta Carnaval 30 tabata t’ey sigur. Hopi kier a gana no pa ta prome pa habri e parada so, pero tabata pa delaster biaha cu SAC a pone e auto como premio y tabatin 17 candidata. E sentimento compara cu eleccion di Reina Hubenil (mi no a participa nunca den carnaval, sin experencia, verlegen y insigur) ta cu mi a bira mas sigur di mi mes y a haya mas experencia con pa anda cu media y publico, cu en general a acepta mi hopi bon mes. Tur e paradanan durante henter e rutanan hendenan banda di caminda tabata aplaudi y pone mi sinti acepta y esey a trece hopi alegria”.

Helene Croes tabata e prome reina cu a conkista dobbel corona den boso categoria, boso a dirigi carnaval na 1977… con bo a sinti cu e logro di dobel corona ?
Dobel corona tabata manera gana un premio grandi, pero dos biaha: Sinti alegria grandi dos biaha. E satisfaccion di mas grandi tabata wak con contento e fanaticonan a bira. E fanaticonan tabata baila riba tono di brassband den tribuna y tabata keda sin stem despues di a grita tanto, emocionnan y adrenalina tabata bay halto!

Tin algun contratiempo cu a surgi ultimo momento prome of durante e eleccionnan?
Cu mi ta corda cu tur cos a bay bon en general. Manera mi a bisa, e tempo ey no tabatin stres di show y inverti asina hopi cen. Ta e show ta causa hopi stres mental y pa cartera. Tur hende tabata basta relaha.

Con cada celebracion tabata despues cu bo a gana e tempo ey?
Cu Reina Hubenil, 42 aña pasa, na 1977, stage y pasarela a cay aden ora fanaticonan a subi ariba pa felicita. Despues di eleccion tur hende a basha bay Connie Francis Club, grupo di brass band di A.J.M.G (Aruba Jongens en Meisjes Gilders) cu mi tabata miembro, a toca. Cu Reina di Carnaval despues di eleccion nos a bay mi cas y wak e repiticion di eleccion cu famia, amigonan y hopi fanatico. Ami a presta un telefoon na bisiña pa yama mi comprometido pa bise cu mi a gana e eleccion y un auto . Despues mi a duna un fiesta di gradicimento pa tur e personanan cu a yuda mi.

Ki segun bo cu tabata e impacto cu bo a gana ambos Eleccion di Reina?
E impacto cu mi a gana e eleccionnan segun mi tabata mi simplesa y un sonrisa grandi y constante, causa pa e apoyo inmenso di mi fans!

Con bo a experiencia e paradanan di carnaval?
Ambiente di e parada despues tabata super bon y cu un aceptacion total di e publico.

Segun opinion di Maristella cu e ta sigur cu tabatin hopi reina cu por a haci un gran impacto riba dje, pero e mes tabata 9 aña ausente bibando na Hulanda y despues dedicando na educacion di nan 3 yiunan, cu a haci cu e no tabata activo mas den Carnaval. Si e ta goza cada aña inmensamente di Carnaval para na banda bailando cu su famia, amistad y invitadonan. Cu e por a sigui tabata e reina di co-co-colegio Natasha Felix, persona bunita, alegre y energetico cu a kibra e tradicion di bistir blanco. El a bisti un diseño di meneer Johnny Vingal cu tabata un jumper cu un gay colorido na su schouder. Mayorie Flemming cu a impacta cu su beyesa y un show cu nunca antes a wordo haci, saliendo di un haula cu a wordo baha cu un crua. Alina Mansur cu su beyesa y show spectacular.

Maristella hunto cu su casa Marcel Meelis y nan yiunan: Ghislaine, Isabelle y Jean-Martin

Bo yiu muhenan nunca tabatin e gana pa competi pa reina?
Nos tin dos yiu muher cu tin un bunitesa di paden y pafor. Mi ta kere cu tur mama orguyoso di nan yiunan ta bisa esey, cu dos diferente personalidad, e mayor nunca kier a competi pa reina y hasta no tabata gusta. Door cu e tin mesun apariencia cu mi tur biaha hende ta puntre pakico e no ta bay competi manera su mama. E mas jong si di chikito a bisa mi cu e kier participa pa reina, pero ta nos mes a strobe, spera cu nos no a kibra su soño. E ta un mucha alegre y ta lanta den un ambiente cu tin respect mutuo y no tin cu ofende niun hende. Nos a nenge pa e bay competi pa protehe. Nos sa con vunerabel y sensativo e ta. Awendia tin hopi critica y ofensa, cu por haci mucha jong infeliz, tin hendenan cu no ta tene consideracion cu sintimento di un persona.

Ki ta Maristella comentario di e Eleccionnan di Reina di e aña aki?
Sinceramente mi a cuminsa wak e eleccion y pega soño di cansancio di trabou, cu mi no a wake. Pueblo mester acepta e desicion di hurado y ricibi nos reinanan di Aruba su Carnaval 65 cu respect y aprecio. Carnaval ta union, Carnaval ta ALEGRIA!!

LEAVE A REPLY

Please enter your comment!
Please enter your name here