Como Caiso Queen e feeling ta hopi ‘surreal’ pa Tabitha Smith-Heemstadt. Lady Ambiance ta ainda den shock di kico tur a pasa diadomingo marduga den Carnival Village. Pa loke ta e inspiracion di e letra ‘My Hope’ ta pa Tabitha uno divino. Unda en bes di djis critica of keha – nos por uza e plataforma pa activa e pueblo pa haci miho. Pa nos laga un legacia pa e generacionan cu ta biniendo despues di nos. Tabitha ta un embahador pa HopeAruba Movement den e area di ‘Nos Balornan’; kiermen den tur cos cu nos haci nos balornan positivo mester wordo enfoca riba dje.
Tabitha ta bin di un famia hopi musical y e ta conoci pa su talentonan musical. E tin mas cu 30 años liderando gruponan musical y dirigiendo coro y ekiponan di musica na nivel nacional y internacional. El a competi den plataformanan internacional como X-Factor y a graba cu varios artista. Den actualidad e ta propietaria di Ambiance Productions, unda hunto cu su casa Emanuell nan ta concentra riba temanan manera desaroyo di artistanan, creacion di media y produccion di evento- y conciertonan pa henter e nacion. Tabitha ta comparti su bida con su casa Emanuell y hunto nan ta mayornan di Jahvier. Nos Caiso Queen 2019 a sirbi como pastora, maestra, directora di musica, coordinadora, consehera, mentor y administradora, y el a haci esaki pasobra un di su balornan fundamental personal ta pa sirbi su comunidad.
Con Tabitha a sinti riba stage interpretando “My Hope”?
Mi a sinti mi hopi nervioso prome cu nos a subi. Door cu nos tabata e ultimo Banda den e festival. Pero unabes nos a subi tur nervio a bay y e focus tabata riba e mensahe cu nos a bay pa trece.
Ki ta su opinion di e reaccion di e publico?
E publico su reaccion tabata y ta tremendo. Nan a ricibi e mensahe cu un curason habri!
E no ta usual cu un creyente Cristian ta participa den actividadnan carnavalesco
Mi ta kere e mensahe cu nos tin pa trece ta asina poderoso cu e lo mester wordo treci tur caminda y no djis den nos circulo Cristian.
Ta sinti cu a kibra un barera?
E cosnan menos bon cu ta sosode durante di Carnaval ainda no ta algo cu mi por ‘ever’ para tras di dje! Pero mi tin speransa cu cos lo cambia. Y mi ta willing pa cuminsa na mi mes, sea e cambio!
Como Caiso Queen con lo celebra Carnaval 65?
Como e Queen di Caiso, mi lo celebra Carnaval mane mi a hacie henter mi bida largo… rustig na cas cu mi famia!
