E idea a surgi masha spontaneo pa post e potretnan bieu di ‘carnaval ora cu Rossini a topa un biaha cu algun potret. E reaccion tabata asina grandi y yen di entusiasmo, cu el a sigui cu esaki. El a keda yena album, te cu awor tin 12 album dedica na Aruba su dushi Carnaval. Ora por, e ta felicita tur e Reinanan riba nan B-day, paso nos no mester lubida, cu nan a haci nan best pa engrandece nos Carnaval cu nan gracia y nan beyesa. Y semper lo nan ta E REINA di e aña ey, di tal club, scol of organisacion. Esey lo no cambia, paso nan a haci historia. ‘Once a Queen, always a Queen’.
Na 2002 Rossini a bay Hulanda pa vakantie cerca su mama. Debi na un caida di su mama y cu e no tabatin hende pa cuid’e henter dia, Rossini a dicidi pa keda. Unabes na Hulanda Rossini a encontra algun proyecto interesante. Door cu semper e tabata den Carnaval, el a lanta su mesun grupo; Kingdoms Under The Sun na 2003, cu ta un grupo basa riba Carnaval di Aruba y el a join e organisacion Aruba Uni. Semper Rossini a dedica su mes na Carnaval y a bira miembro tambe di FECC (Federation European Carnival Cities) y hunto cu sra. Marcia Stamper, nan ta promove Carnaval di Aruba rond Europa.
Tur aña Rossini ta manda Reina di Carnaval y e tin varios logro: 5 titulo di Reina di Hulanda, 2 Reina Internacional, 5 Reina pa London, Inglatera, 3 Reina pa Paris, Francia. Su reinanan semper ta e damanan Arubiano of di decendencia Arubiano, poniendo semper nos mes hendenan prome. Rossini ta confecciona e trahenan nacional tambe pa e Missnan di Hulanda y asina el a logra gana 6 biaha e titulo di Best National Costume den diferente certamen y pa Miss Universo el a logra na dos ocasion ta den top 7. Sin laga afor, cu su grupo mes, casi semper ta keda den e prome 3 lugarnan.
Como carnavalista e ta hayando Carnaval di Aruba ta bira mas grandi y bunita tur aña. Locual pa Rossini ta un obstaculo ta e “Pretty Mas” cu ta prevaleciendo actualmente. Bo no sa mas kico un grupo ta representa, door di nan trahenan. Puro fantasia cu hopi biaha no ta significa nada. Asina lo por tuma cualkier ‘floormember’, y pon’e den full un otro grupo, y lo no riparabel. E diseñadornan mester tene cuenta cu e tema y mester tin cuidou cu nos Carnaval no ta bira djis un fiesta di pluma.
