Memey di hopi alegria y felicidad, celebrando e enlace di e pareha Fernandez-Acosta na Medellin, Colombia dia 16 di december 2018, Jair Oduber a ‘pop up’ e pregunta na Militza Gietel riba e pista di baile. E futuro señora Oduber tabata hopi sorprendi y alabes hopi feliz, como cu e no a spera cu Jair lo pidie na cualkier momento pa casa pronto. Nan tin un relacion saludabel y nan ta bay hopi bon cu otro, compartiendo hopi cos cu otro, pero e “stap” ey, Militza no a spera cu Jair lo a tum’e awor caba.
Militza ta Director of Human Resources Operations na Aruba Marriott. Un posicion cu ta trece hopi responsabilidad cu ne. Militza a join e famia di Aruba Marriott na 2014 y ta bin ta eherciendo su trabou cu hopi dedicacion for di e tempo ey. Jair ta polis pa mas cu 20 aña caba. El a join Korps Politie Aruba na 1997 y actualmente Jair ta labora na Departamento di Recherche. Su trabou ta uno cu fisicamente y mentalmente ta rekeri hopi di su persona. Mescos cu Militza, e ta traha oranan largo y tin hopi pasion pa su trabou.
Unda y ki tempo tabata boso prome encuentro?
Nos prome encuentro tabata na 2014 durante un fiesta di trabou na Marriott, via un amigo en comun.
Di un amistad a surgi un relacion mas profundo?
For di e prome encuentro a nace un amistad. Nos tur dos ta personanan social y tabata pasa pret, ora nos topa ocasionalmente den e actividadnan social cu amistad mutuo. Despues di mas cu un aña di amistad, na final di 2015, nos a cuminsa train hunto den un grupo. Nos tabata pasa mas tempo cu otro y asina a siña conoce otro miho. Nos amistad a sigui intensiva, sinembargo el a keda uno simplemente amistoso. Ta te na april di 2016, durante un encuentro social, e chispa a cende inesperadamente y for di eynan e relacion a cuminsa desaroya den uno amoroso. Nos a cuminsa pasa mas y mas tempo hunto y corto tempo despues, nos a bay biba hunto. Algun luna despues nos a cuminsa construi nos cas y na final di 2017 nos a drenta esaki.
Ki ta locual ta atrae boso cada un?
Militza: Locual ta atrae mi di Jair ta su forma di ta. E ta un persona “caring”, “supportive” y “outgoing”. Pues e ta pone mi sinti hopi comfortabel y feliz y mi ta disfruta su compania. Tambe e ta un persona cu ta echt cuida di su fisico, locual ta hacie un persona atractivo.
Jair: Di Militza mi por bisa cu m’a hay’e un persona hopi ‘open’, por papia cu ne riba cualkier tema, e ta super alegre. Tambe e ta un persona hopi ‘caring’ y ‘supportive’. Apart di esey den poco tempo m’a bin conoce un grupo di amistad di Militza, cu tur ora nos topa, nos ta pasa super great. A trata mi manera cu nan conoce mi pa hopi aña caba. Loke cu a caba di pone mi sinti mi full na cas ta, su yiu homber, cu a pega na mi asina hopi, te cu hasta ta yama mi yiunan su “sisters”.
Ki ta boso pasatempo preferi?
Disfruta otro su compania na nos cas, cu nos yiunan y nos famia. Y tambe comparti e ratonan social cu nos amistadnan.
Jair con a surgi e idea pa ‘pop up’ e pregunta na Medellin?
Mi tabata cana cu e idea aki pa un tempo caba. Manera menciona nos ta click hopi bon cu otro como persona y nos ta disfruta pasa tempo hunto, compartiendo cu nos sernan keri. Militza ta un persona comprensivo y ta duna mi e espacio pa mi ta mi mes den e relacion. Locual ta hopi importante pa mi como persona. Na Medellin, celebrando amor y amistad cu varios persona yega na nos, mi a sinti mi inspira y cla pa “pop the question” dunando Militza e balor y honor cu e merece y asina hacie mi señora.
Tin un fecha y tema escogi pa e enlace?
Nos tin un fecha tentativo y algun idea pa cu e tema. Locual nos por divulga ta, cu e lo bira un “destination wedding” cu lo tuma lugar den 2020.
