Memey di tur e preparativonan pa diabierna dia 10 di mei, Alvicia Donata, bisa SI na e amor di su bida, Joswain Werleman, el a ricibi awe e sorpresa pa su despedida di soltera. Manera ta e tradicion den e celebracion aki, cu e madrina ta esun cu ta tuma e encargo pa organisa e bridal shower. Su miho amiga y ken el a scoge como su madrina, Joelly Croes, a organisa e bridal shower pa Alvicia na Taste of Belguim.
Den edicion di FOCUS di december aña pasa, Joswain y Alvicia a comparti e noticia di nan matrimonio pa 2019. E pareha a conoce otro door di nan amigonan 12 aña pasa. Nan tin un yiu muher, Alizain (3), cu ta e bendicion di mas grandi cu bida a ofrece nan. Joswain a ‘pop up’ e pregunta riba un atardi band’i lama, cu bahada di solo den presencia di Alizain y nan mayornan. El a sinti cu tabata e lugar y momento perfecto, pa pidi e amor di su bida pa e compañ’e pa semper. Pa Alvicia esaki tabata un momento inolvidabel: “Mi a bira hopi emocional, feliz y nervioso alabes.
E sonrisa y alegria riba e cara di e ‘bride-to-be’ a contagia tur esunnan presente durante e bridal shower, cu tabatin su toke romantico y elegante. E bunita decoracion cu e detayenan den e tononan ‘pink’, ta e color cu a resalta tambe riba e mesa di cos dushi. E invitadonan a disfruta di bubbly acompaña pa hors d’œuvres mientras cu nan tabata entretene nan mes cu diferente wega. Alvicia a ricibi diferente regalo special pa un futuro ‘novia’ y esposa, y sigur e lo bay luci radiante diabierna awor tanto pa su matrimonio civil como pa su bendicion nupcial. Lo tin un cobertura di e matrimonio den revista FOCUS di juni.
