Dukesa di Sussex a duna luz na su prome yiu cu prins Harry awe mainta. E realesa recien naci lo tin e titulo di Earl of Dumbarton. E noticia a ser anuncia pa e tata orguyoso, cu a bisa cu e ta emociona di anuncia cu nan a haya un baby awe mainta tempran, un baby sano. E duke a drumi apenas dos hora, pero su emocion tabata evidente ora el a dirigi su mes na e miembronan di prensa. E mama y baby ta bon y ta e experiencia di mas increibel cu hamas bo por imagina. E prins a añadi cu locual un muher ta haci ta’beyond comprehension’. Prins Harry a bisa cu esaki ta e prome nacimento cu el a presencia y tabata absolutamente increibel. Cu e baby chikito ta absolutamente ‘to-die-for’ y cu e ta ‘over the moon’. E sexo di e baby tabata un sorpresa pa e pareha, cu a dicidi pa no averigua ki nan lo bay haya. Ora a puntra e feliz tata si nan tin algun nomber caba, el a contesta cu ainda nan ta pensando riba e nombernan. Como e baby a tarda un poco pa nace, nan tabatin un poco tempo pa pensa riba esey. Aki dos dia probablemente tur hende por wak e baby manera cu nan a planea como famia.
E declaracion oficial di e Palacio a informa: Su Alteza Real, Dukesa di Sussex a duna luz sin peligar awe mainta 5.26, e baby a pisa 7lbs 30z. E Duke di Sussex tabata presente na e nacemento”. E mensahe ta sigui: E Reina, Duke di Edinburgh, prins di Gales, Dukesa di Cornwall, Duke y Dukesa di Cambridge, lady Jane Fellowes, lady Sarah McCorquodale y Earl Spencer, a ser informa y ta encanta cu e noticia. “E mama di e dukesa, Doria Ragland, ta feliz cu e yegada di su prome nieto, y ta cu su Alteza Real na Frogmore Cottage: E declaración a conclui: “Su Alteza Real y su baby ta bon”. E baby real ta e septimo den e linea di trono, y di ocho nieto di e Reina y prins Philip. E recien naci ta e primo mas chikito di prins George, prinses Charlotte y prins Louis. E noticia di e nacimento di e baby a wordo anuncia oficialmente na e publico despues cu e Reina y otro miembronan di e famia real a ricibi e informacion. Awe 5pm ora di Londres, e ‘ezel’ ceremonial anunciando e nacimento a ser poni na Buckingham Palace, y e noticia lo keda exhibi pa e publico te cu diamars 8or di anochi. Awor e ‘royal watchers’ ta ansioso pa haya e prome ‘glimpse’ di e baby di prins Harry y Meghan Markle.
