E emperador nobo di Hapon, Naruhito, a inicia un era imperial nobo durante un ceremonia solemne realisa despues di e abdicacion di su tata. E ceremonia a tuma lugar riba e prome dia di e era imperial nobo, Reiwa, (bunita harmonia), cu lo dura durante henter e reinado di Naruhito. E emperadornan hapones no ta uza corona, y Naruhito a ricibi un spada y un joya, cada un den un caha lora den tela hunto cu un spiel, riba e prome dia di su deber oficial. Esakinan ta simbolonan di e poder imperial. Tur e elementonan uza den e ceremonia a ser duplica, ya cu e obhetonan real ta warda den santuarionan na e pais y nunca ta wordo mira. Den su prome discurso na e nacion, Naruhito di 59 aña, a hura pa actua segun e Constitucion y semper orienta su pensamento na fabor di e pueblo y ta na nan banda. Educa na Oxford, Naruhito tin su dilanti e dificil tarea pa continua cu e legado di su tata.
Emperatriz Masako Owada, tabata un diplomatico cu a renuncia su carera pa casa dia 9 di juni 1993, cu e principe heredero. Sin embargo el a haya dificultad pa adapta na e bida di e palacio real. Hopi tabata e speculacionnan cu e motibo di e depresion di Masako tabata door di e presion pa haya un yiu homber. Su embaraso a tarda y despues di varios tratamento di fertilidad y un aborto, el a haya su yiu muher Aiko dia 1 di december 2001. Dos aña despues, e Cas Imperial a revela cu e ta sufri di stres, pero e realidad tabata mustra cu e no a recupera totalmente. Masako a pasa varios aña cera den e palacio sin por a sali pa cumpli cu su compromisonan oficial. E yiu muher, prinses Aiko, no por hereda e trono debi cu e ta hende muher.
Reina Máxima y emperatriz Masako tin un amistad fuerte y intimo durante hopi aña. Prueba di esaki ta cu e poco biahanan cu Masako a abandona su retiro y sali for di su palacio, tabata pa bishita e pareha real na Hulanda. Na 2006 Masako hunto cu Naruhito y prinses Aiko, a pasa vakantie na Hulanda den un di e momentonan mas dificil pa Masako. Esaki door cu su cuña prinses Kiko a duna luz na un yiu homber, cu a kita Aiko for di e trono di sucesion. Na 2013 e pareha real hapones a biaha pa Hulanda y tabata presente na e coronacion di Willem-Alexander y Máxima como reina consorte. Na 2014 e reynan di Hulanda a haci un bishita oficial na Hapon y eynan Máxima cu ta conoci pa su spontanidad, a desvia di e protocol y el a duna Masako dos sunchi y un brasa.
