Revista FOCUS su edicion di mei manera tur aña ta ‘highlight’ e tema di ‘Mother’s Day’ cu Mamanan cu tin algo particular pa comparti cu e lectornan. Cuminsando cu Yelitza Domacassé-Helmeyer cu ta riba portada y siguiendo cu Laila de Cuba y Lisbeth Thijsen, cada un ta comparti nan experiencia di bira mama riba 35 aña, cu ta cay den e edad risico pa haya yiu.
Yelitza Domacassé-Helmeyer
Yelitza a haya sa hopi liher cu e ta na estado. A penas e cu su casa Herbert Domacassé a bin bek di un vakantie, Yelitza a cuminsa sinti malo. Na prome instante el a kere ta un virus of kisas e cambio di cuminda. Sinembargo un mainta trempan, sinta na mesa, e tabata sinti marea y a lanta pa bay traha, pero el a casi cay. E señora cu ta yuda nan na cas a bis’e cu Yelitza a lag’e corda tempo cu e mes tabata na estado. Yelitza y Herbert ta gradici y ta describi nan morocho, Joah y Jeyah como un milager y soño cu nan no a spera di por a bira realidad, pero ora cu Dios ta den control, tur cos ta posibel.
Laila de Cuba
Cu su 42 aña, Laila de Cuba, a haya dia 25 di juli 2018 su promer yiu: Millan Bjorn cu a pisa 7.9 liber y tabata 54cm largo. Na momento cu Laila a haya resultado cu e ta spera un baby, tabata un sorpresa grandi p’e, ya cu el a kere cu e no por haya yiu mas. Laila tabata hopi contento y trankil cu su mama tabata cu ne durante su parto na Merca. Laila den su entrevista ta bisa entre otro cu e beneficio mas grandi di a duna luz na Merca ta e trankilidad cu nan ta mihor ekipa pa cualkier emergencia. Su parto a bay bon pero despues mester a regresa hospital paso el a bira hopi malo.
Lisbeth Thijsen
Haya yiu cu 19 aña y despues bo di dos yiu cu 40 aña, Lisbeth Thijsen por bisa cu cada embaraso tin su detayenan cu ta hacie diferente. Cu 19 aña Lisbeth a experiencia hopi miedo, maske e tabatin sosten di su mayornan, sin laga afor e parti di bo pensamentonan tocante varios topico, manera; alimentacion, cuido, cambio y bo ta mas atento di tur detaye, compara cu e promer yiu. Loke si tabata igual ta e ‘premature weeën’, ya cu Lisbeth a haya su promer yiu cu 8 luna y Mason Jayden el a hay’e cu 36 siman. Despues di 21 aña cu Lisbeth ta haya su di dos yiu, sigur tabata un momento pa para keto, paso e sa cu e ta den e grupo di edad cu mas risico.
