E fecha 10 di mei ta uno cu tin un significacion hopi special pa Alvicia Donata. Riba e fecha aki tanto su wela di parti mama como su mesun mama a casa. Awor e nieta y yiu ta sigui e tradicion familiar pa casa riba e fecha aki pa civil y pa misa. Den e horanan di mainta a yega Stadhuis den un bus, Joswain Werleman & Alvicia Donata, acompaña nan testigo-, famia-  y amigonan. Nan a ricibi un bunita sorpesa cu e musiconan presente tocando den e sala momento di a haci nan entrada. E oficial di registro civil a conduci e ceremonia splicando e pareha di e debernan cu ley ta stipula den estado matrimonial. Despues cu nan a ser declara como esposa y esposo nan a ricibi un fuerte aplauso di tur presente mientras nan a duna otro e prome sunchi como Señor  & Señora Werleman.

Despues di e ceremonia civil e famia a reuni na Renaissance Suites pa un brindis y pa cuminsa cu e preparacionnan pa e ceremonia eclesiastico. E estilista Edgar Kock y su team tabata encarga cu e makiyahe y peinado di e bride, bruidmeisjes, mama y suegra. Segun e ora stipula un bus a yega Renaissance Suites pa hiba Joswain hunto cu su mama, Magali y ful e grupo cu lo compañanan durante e ceremonia pa Misa St. Filomena na Paradera.

Despues a yega Alvicia acompaña pa su mayornan pa hunto nan hibe altar unda Joswain cu su mayornan tabata spera su yegada.  Pastor Toti a duna un bunita predicashi unda el a pone enfasis riba e palabra ‘amor’ y e cuater elementonan di amor cu ta; conocemento, afeccion, respet y oracion. E madrina y padrino ta e miho amigonan di e pareha, TJ Alhip y su pareha Joelly Croes.

Pa celebra e grandioso dia di e enlace matrimonial di Joswain & Alvicia, a sigui parti anochi e celebracion na Renaissance Convention Center. E sala decora den blanco cu e tokenan den e color ros a keda elegante y sofistica. E invitadonan a disfruta di diferente ‘stations’ di cuminda di varios pais y unda no por a falta e platonan tipico di Aruba. Entre e invitadonan tabatin varios amigo cu a bin di exterior pa e enlace matrimonial di Joswain & Alvicia, y nan por a purba tambe nos propio cuminda crioyo. E ambiente sigur tabata fenomenal cu e presentacion di N’Fusion, cu den nan estilo unico a anima e fiesta. Den edicion di FOCUS di juni lo tin un cobertura completo y cu tur e detayenan di e enlace di Joswain Werleman y Alvicia Donata, awor Mr. & Mrs. Werleman.

LEAVE A REPLY

Please enter your comment!
Please enter your name here