Mary Spellen, Focus Best Dressed 2016, a sali e biaha aki den revista FOCUS hunto cu su unico yiu, Rebecca Spellen. Mama y yiu a coordina outfits pa realisa un photo shooting unico pa edicion di mei. Locual a resalta ta, cu e biaha aki ta e yiu ta haci e preguntanan na su mama. Rebecca a haci 19 pregunta na Mary, cu ta representa un pregunta pa cada aña, cu el a scoge pa haci na su mama.
Mary ta eherciendo orguyosamente tres profesion, cu semper el a soña cu ne: un muher profesional, mama y casa. Mary ta e ‘managing director’ di Discovery Travel y no ta un tarea facil di eherce band’i tur su otro trabounan. Tin hopi reto, specialmente ora e kier dedica mayoria di su tempo na cada un di nan, sin lubida tempo pa su mes. Mary for di 1 di october 2019, lo bira e ‘First Lady’ band’i su casa Robert Spellen, cu lo tuma e funcion di Governor for the Eastern Canada and Caribbean District of Kiwanis International 2019-2020.
Rebecca for di chikito tabata un mucha muher cu hopi energia cu nunca por a sinta keto. Su mayornan a dicidi di pone den un deporte, pa asina e por saca tur su energia. Un di e deportenan aki a resulta di ta turnen, cu ta e deporte, unda Rebecca a crece aden den tur sentido. Un deporte cu a siñ’e hopi cos, entre otro; disciplina, pasenshi y con pa semper vence bo miedonan. Rebecca ta haci algun pregunta masha peculiar na Mary y asina a haya e contestanan cu e tabata desea di haya sa!
