Skirbi pa Keyla Reeder

Tur persona a yega di experencia un of mas biaha den nan bida un decepcion of engaño, specialmente ora esaki ta trata di infidelidad. E concepto di infidelidad riba su mes ta uno, cu pa cada pareha tin su propio nificacion. Cada pareha of persona ta dicidi di “trek e liña” y ta pone cu ta existi friccion y desacuerdo. Awendia tin mas cu 1000 diferente dating apps y no ta tur ora, necesariamente, esaki ta uza pa e encuentronan romantico. Na april di 2017 a haci un estudio riba dating apps di cual 43% di e respondientenan a indica cu nan ta uza esaki, solamente pa combersa, pasa tempo y no pa busca relacion serio, a pesar cu kisas nan tin pareha. E influencia di medio social y con facil e acceso pa por satisface cualkier necesidad emocional y hasta sexual, ta djis un ‘click away’. E tentacion pa por tin un poco diberticion online y momento placentero, cu un persona completamente diferente y tin ora hasta anonimo, ta trece mayoria pareha den man di un terapista di relacion, pa asina purba reviva e relacion of kisas termina esaki. Segun Relationship Therapist Enid de Kort, den su practica diario e ta encontra hopi pareha, cu pa motibo di infidelidad emocional y infidelidad sexual, ta pone nan busca ayudo na un profesional.

Infidelidad Emocional

Pa por compronde e diferente formanan di infidelidad ta importante, pa reconoce kico ta infidelidad emocional y con esaki ta diferencia den infidelidad sexual of fisico. Den un infidelidad emocional segun Relationship Therapist Enid de Kort; “un persona den un relacion di pareha ta desaroya un conexion profundo y intimo cu un otro persona”. Den un situacion asina, e persona ta pasa mas tempo comunicando e topiconan intimo cu e otro persona y no cu su pareha. E forma di infidelidad aki no necesariamente ta encera relacion sexual, cu e di tres persona, pero si ta desaroya den un relacion profundo y intimo.

Infidelidad Sexual

Contrario di un infidelidad emocional, e infidelidad sexual ta uno, caminda un persona den un relacion di pareha tin relacion sexual cu un di tres persona. No tur ora esaki kiermen namoramento. E por ta tambe un relacion di satisfaccion carnal y tin ora, e por ta mas facil pa detecta. Infidelidad sexual tambe sa trece cu ne, cu e pareha cu ta haci esaki, ta core riesgo pa haya un infeccion of malesa sexual entre otro herpes, chlamydia, gonorrhea, y symphilis pa menciona algun, si no ta practica “safe sex”.

Tentacion of Motibo pa Ta Infiel?

E rason pakico un persona den un relacion di pareha ta scoge pa ta infiel ta varia pa cada persona. For di punto di bista di un Relationship Therapist un persona y segun testimonio di e parehanan den terapia, esaki ta un escogencia cu ta pasa inconscientemente. Un ‘affair’ ta cuminsa hopi inocente y como algo hopi spontaneo, cu segun tempo por bira mas profundo, ya cu ta inverti hopi tempo y emocion den esaki. Mayoria infidelidad y ‘affairs’ ta cuminsa cu un amistad inocente y mas esaki ta sigui desaroya cu mandamento di emoji pa otro, exigi mas tempo y atencion di otro y te hasta intercambia potret of video intimo cu otro. Loke si por ta sigur di dje ta, cu mayoria persona den relacion ta en busca di atencion di un of mas persona, cu no ta nan pareha. E personanan cu ta infiel na nan pareha pa medio di chat, video of un relacion virtual cu un otro persona, por admiti cu mayoria biaha nan ta haci esaki, pero cu nan no kier perde nan relacion cu nan pareha. Despues cu descubri e ‘affair’ aki, e persona mester haci un escogencia entre su pareha of e di tres persona di cual hopi pareha ta busca ayudo cerca un profesional, manera un Relationship Therapist, pa yuda reinforsa e relacion.

Punto di Salida pa Pareha

Den hopi caso infidelidad por ta un señal, cu algo den e relacion di pareha mester mehora. Por ta cu e conexion,amistad, comunicacion y sexualidad den e relacion di pareha ta bahando. No ta tur ora den caso di infidelidad virtual of cualkier otro forma di infidelidad esaki mester nifica cu e relacion ta termina. Ta rekeri di ambos pareha pa para keto y analisa pa nan mes hunto cu un profesional: con y ki tempo e relacion a desaroya, kico ta e banda fuerte di e pareha, con nan a yega di resolve problema di relacion den pasado, ki tempo e problemanan a cuminsa y con como pareha ta traha tempo pa ta intimo cu otro of anda cu ‘dates’. Un infidelidad no ta un fin na un relacion y e posibilidad pa surpasa esaki ta existi. Claro cu despues di cualkier forma di infidelidad e conexion entre pareha ta kibra y ta tuma tempo pa crea esaki bek. Confiansa y comunicacion ta e base solido pa tin un bon relacion.

Segun Enid de Kort “Den mi experencia hopi hende no ta para keto na nan limitenan. Kico kiermen surpasa un limite. Con bo ta comunica cu un di tres persona? Kico bo ta papia cu ne y e tempo cu bo ta dedica na chat viral na lugar di pasa mas tempo cu bo pareha? Tin diferente manera di wak infidelidad. Tin cultura cu ta normal pa tin 2 pareha of mas. Mi ta haya cu ta hopi importante pa pareha comunica tocante nan limitenan y con pa pasa tempo hunto, pa asina keda sinti e conexion y confiansa mutuo”.